شاته

نړیوالو سازمانونو د طالبانو له خوا پر ښځو نوي لګېدلي محدودیتونه وغندل

د بشري حقونو د څار نړیوال سازمان په افغانستان کې د طالبانو له خوا پر ښځو نوي لګېدلي محدودیتونه غندلي دي.

په افغانستان کې د طالبانو له خوا پر ښځو د تازه لګول شویو محدودیتونو پر وړاندې غبرګونونه دوام لري.

د بشري حقونو د څار سازمان د اسیايي څانګې مرستیالې پاټریشیا ګاسمن بېګا ازادي راډیو ته په یوه غږیز پیغام کې وویل چې طالبانو یوځل بیا ثابته کړه چې د انسانانو بنیادي بشري حقونو ته هېڅ ډول درناوی نه لري او ارزښت نه ورکوي.

د بشري حقونو د څار سازمان د اسیايي څانګې مرستیاله پاټریشیا ګاسمن
د بشري حقونو د څار سازمان د اسیايي څانګې مرستیاله پاټریشیا ګاسمن

ګاسمن وویل: "په ښکاره لیدل کېږي چې طالبان غواړي تر کوم بریده وړاندې ولاړ شي او غواړي ډاډه شي چې د افغان ښځو او نجونو ژوند یې څومره بدمرغه کړی. دا وضعیت د یوې خپسې په څېر ډاروونکی شوی ځکه طالبان د خپلو پالیسیو د تطبیق په دوام غواړي د بشر بنیادي حقونو ته سپکاوی وکړي."

طالبانو په یوه تازه اقدام کې افغان مېرمنې پارکونو ته له تګه منع کړې.
طالبانو په یوه تازه اقدام کې افغان مېرمنې پارکونو ته له تګه منع کړې.

له دې مخکې د طالبانو د حکومت د امر بالمعروف او نهی عن المنکر وزارت ویاند عاکف مهاجر ویلي و، چې له دې وروسته به ښځو ته اجازه نه وي چې پارکونو ته ولاړې شي.

رویټرز خبري اژانس د ښاغلي مهاجر له قوله خبر ورکړی چې وايي، طالبانو هڅه وکړه چې په تېرو ۱۴- ۱۵ میاشتو کې د اسلامي شریعت او افغاني فرهنګ په اساس پارکونو ته د ښځو د تلو شرایط برابر کړي خو نوموړي زیاته کړه چې له یوې خوا د پارکونو مالکانو لازمه همکاري ونه وکړه او بل خوا ښځو لکه څنګه چې لازمه وه، حجاب مراعات نه کړ.

په افغانستان کې د ښځو د حقونو فعالانې وايي چې ټولې ښځې هم پخوا او هم اوس په پوره اسلامي حجاب کې په عمومي ځایونو کې ګرځي نو ځکه د دوی په وینا د طالبانو نوی فرمان ځان ته سپکاوی ګڼي.

د افغانستان په پلازمېنه کابل او نورو لویو ښارونو کې ډېری ښځې نه غواړي چې خپل مخونه پټ کړي، خو د طالبانو له بیاځلي واکمنېدو وروسته اړې شوې دي چې خپل مخونه په طبي ماسکونو پټ وساتي.

لوېدیځو هېوادونو په وار وار له طالبانو غوښتي چې د ښځو حقونو ته درناوی وکړي خو طالبانو دا غوښتنې له پامه غورځولي دي.

طالبانو په تېرو نږدې ۱۵ میاشتو کې له شپږم د پورته ټولګیو زده کوونکې نجونې له تعلیمه بې برخې کړي، په ټولو دفترونو کې یې د ښځو پر کار کولو محدودیت لګولی، ښځو او نجونو ته اجازه نه ورکوي چې یوازې له کورونو ووځي او دا دی اوس یې پارکونو او تفریح ځایونو ته هم د ښځو پر تګ بندیز ولګاوه.

لوېدیځ هېوادونه ټینګار کوي چې له طالبانو سره هر راز تعامل به په افغانستان کې د ښځو او نجونو حقونو ته په درناوي پورې تړلی وي او همدا علت دی چې تراوسه د نړۍ هېڅ هېواد هم د طالبانو حکومت په رسمیت نه دی پېژندلی.

اړوند مطالب