کرونا له۲ میلیونو زیات کسان مړه کړل،ګڼ هېوادونه بېړنیو حالاتو ته ورګرځي
کرونا وبا په څه باندې یوه کال کې له دوو میلیونو زیات کسان مړه کړل او لا هم د ګڼو خلکو ژوند ګواښي.
که څه هم د ویروس د له منځه وړلو لپاره د تازه جوړو شوېو واکسینونو تطبیق پيل شوی، خو د ویروس چټک خپراوي ګڼ هېوادونه اړ کړي چې بیړنیو حالاتو ته ور وګرځي.
د امریکا د جانز هاپکېنز پوهنتون د شمېرو له مخې په ټوله نړۍ کې د جنورۍ تر پنځلسمې له ۹۳ میلیونو او پنځو لکو (۹۳۵۸۰۸۲۸) ډېر کسان په کرونا اخته شوي چې له ډلې یې تر دوو میلیونو ( ۲۰۰۳۶۲۵ ) زیات کسان مړه شوي.
د جانز هاپکېنز پوهنتون ورځنۍ سروې هم ښيي چې د کرونا خپراوی د نوي کال تر شپو او ورځو را وروسته په ګڼو سیو کې یو ډول دی.
د روغتیا د نړیوال سازمان 'ډبلیو.اېچ.او' مشر تدروس ادهانم ګبريسوس ویلي، غواړي چې د کرونا ضد د واکسین کمپاین په سلو راتلونکو ورځو کې د نړۍ په ټولو هېوادونو کې پيل شي.
هغه د جمعې (د مرغومي ۲۶مه) په یوه خبري کنفرانس کې وویل، غواړي روغتیاپالان او زیانمنونکي خلک لومړی واکسین شي.
د ملګرو ملتونو د سازمان سرمنشي انتونیو ګوتېریش هم په نړۍ کې د کرونا د دوو میلیونو قربانیانو د یادښت په مناسبت ویلي چې ټوله نړۍ باید له کرونا سره د مبارزې لپاره متحده شي.
د کرونا واکسین لومړنۍ محموله د بې وزلو هېوادونو په لور وخوځېده.
ګوتېريش زیاته کړه: "زموږ نړۍ یوې زړه بوږنوونکې شېبې ته رسېدلې ده. د کوویډ – ۱۹ وبا د څه باندې دوو میلیونو کسانو ژوند اخېستی. د دغو ټکان ورکوونکو شمېرو تر شا نومونه او څېرې پرتې دي چې د هغوی موسکا اوس یواځې په یادونو کې پاتې، د غږونه انګازه یې په خونو کې چوپه شوې او د ډوډۍ د میز تر څنګ یې څوکۍ خالي پاتې ده."
ګوتېریش وویل، د دې وژونکې وبا اغېز د نړیوالو همغږیو د نشتوالي په خاطر لا زیات شوی.
د ملګرو ملتونو د سرمنشي په خبره د کوویډ – ۱۹ اغېزمن واکسین راوتلی او ملګري ملتونه د نړۍ بېلابېل هېوادونه هڅوي، څو د نړۍ په تاریخ کې د تر ټولو لوی واکسیناسیون لپاره لستوڼي بډ وهي.
له دې سره تر څنګ د روغتیا نړیوال سازمان تر ټولو لوړپوړې کارپوه سومیا سوامي ناتان ویلي چې د کرونا واکسین لومړنۍ محموله د بې وزلو هېوادونو په لور وخوځېده او په همدې درېیو میاشتو کې وویشل شي.
د دغه سازمان مرستیالې مارین انګېلا سیماو هم یادونه کړې له هغو ۴۶ هېوادونو چې د کرونا واکسین یې پيل کړی ۳۸ یې شتمن دي په داسې حال کې چې باید د نړۍ ټولو خلکو ته د واکسین د رسولو ژمنې او ضمانت وشي.
