علي وزير، نور الله ترين او نور د 30 دسمبر پورې پوليس ته په ريمانډ ورکړی شو
د پښتون ژغورنې غورځنګ [پي ټي اېم] مخکښ او د قامي اسمبلۍ غړی علي وزیر، په کراچۍ کې د پي ټي اېم مشر نور الله ترين او دوی سره نیول شوي درې نور کسان عدالت د 30م دسمبر پورې پوليس ته په ریمانډ حواله کړه.
د کراچۍ د سهراب ګوټ پوليس تاڼې پوليس افسر انسپکټر محبوب الاهي چې د علي وزير نور الله ترين او نورو د قضيې پلټنې کوي، وي او ای ډیوه سره يې په خبرو کې وویل د ترهګرۍ د قضيو د اورېدنو عدالت د 30م دسمبر پورې نيول شوي ملزمان دوی ته حواله کړه.
په کراچۍ کې د پي ټي اېم بل مشر محمد شېر مسيد وايي دوی ته نه مالومه چې علي وزير او نور به د ترهګرۍ د قضيو د اورېدنو عدالت ته وړاندې کوي، ځکه چې وکیلانو يې ورته ویلي ؤ د ملير د سيشن کورټ عدالت ته به يې مخامخ کوي.
په اووم دسمبر د کراچۍ په سهراب ګوټ پوليس سټېشن کې د پي ټي اېم جلسې ته په وېناکوونکو مقدمه درج کړی شوې چې پکې د پي ټي اېم مشر منظور پشتين، علي وزير او محسن داوړ هم شامل دي، په مقدمه کې ويل شوي چې دوی د رياستي ادارو، پوځ، رېنجرز او پوليس پرضد سپکه، د شر ډکه او ناوړه ژبه کارولې وه.
د قضي پلټنې کوونکی پوليس افسر وايي "که په اېف ايي ار کې د ترهګرۍ ماده نه وي او بيا وروسته د ترهګرۍ کومه خبره مالومه شي نو د پلټنو په وخت هم دا ماده شاملېدی شي".
محمد شېر مسيد وايي پوليس چې نن عدالت ته د علي وزیر او نور الله ترين سره درې نور کسان چې شېرايوب، بصير خان او محمد حسن نوميږي، د دوی نومونه يې په اېف ايي ار کې نه ؤ شامل، پوليس تېره شپه هغه وخت نيولي چې په نور الله ترين پسې تاڼې ته ورغلي او بيا پوليسو بند کړي وو.
خو پوليس افسر د دوی د نیولو په اړه وايي، "که په اېف ايي ار کې نوم نه وي او کومه کارروايي شوي وي نو ايا تمه به کولی شي چې د واردات کوونکو نوم په اېف ايي ار کې نشته، مدعي هم د هغوپېژندګلو کولی شي".
علي وزیر چې په 16م دسمبر د پېښور پوليسو نيولی د کراچۍ د پوليسو په وېنا د جمعې په شپه ناوخته یې په جهاز کې کراچۍ ته راوستی ؤ.
او د پي ټي اېم ځايي مشر نور الله ترین پرون ماښام پوليسو په داسې حال کې نيولی ؤ چې دوی د علي وزیر د نيولو پرضد احتجاجي مظاهره کوله.
د سهراب ګوټ پوليس ویلي نور الله ترين يې هم د جلسې په مقدمه کې نيولی دی.
پي ټي اېم د علي وزير د نيولو پرضد پرون د جمعې په ورځ په ټول ملک کې د احتجاجي مظاهرو اعلان کړی ؤ.
