غزل
هوس نه لرم ، شهوت مې په کار نه دی
نه دی ، داسې محبت مې په کار نه دی
ستا د مړو سترګو کاږه کاته مې خوښ دي
ستا د سرو شونډو شربت مې په کار نه دی
تش د مينې نوم د ژبې پر سر نه وړم
تش د تورو تلاوت مې په کار نه دی
دا ياران زما په څه باندې ياران دي ؟
د بوتانو عبادت مې په کار نه دی
زه مې خپل دښمن په مينه ماتومه
که ضرور هم وي ، نفرت مې په کار نه دی
شاعري مې د دې خپل زړه مجبوري ده
شهرت نه غواړم ، شهرت مې په کار نه دی
د دې خپل تندي په ليک ژاړم الهامه !
د دې خپل زړګي قيمت مې په کار نه دی
نصرت الهام
