طاهر بونېرى

شمعې مړه شه، بيا که مرې چې خداى رڼا کړي
خو بلېږه تر هغې چې خداى رڼا کړي

ته پرچار د تورو شپو تورو تيارو کړه
زه باور لرم په دې چې خداى رڼا کړي

وارخطا يم ډاډګيرنه درنه غواړم
ياره! اوس به رانه ځې چې خداى رڼا کړي

ضمير څه چې د فطرت خلاف روان يو
څه امکان دى بيا د دې چې خداى رڼا کړي

زه که نۀ وم په دې کلي کې ملګرو
بلوئ د ژوند ډيوې چې خداى رڼا کړي

د زړه څړيکې او تڼاکې به درښايم
خو ارمان دى تورې شپې! چې خداى رڼا کړي

ړانده پرېږده سترګه ور هم دلته وايي
مونږ به ټول شو بې پردې چې خداى رڼا کړي

بيزوګرې! اى د بل وطن کونترې!
ما به هلته کې بوځې چې خداى رڼا کړي

درنګ ساعت له کور په کور جنګ دى باداره
ته به هم منډې وهې چې خداى رڼا کړي

پښتو وايه پښتو مينه ده طاهره
دومره ناز به مې اوړې چې خداى رڼا کړي