داڅو اوښکې دي ګرېوانه دادې تاسره يادګار وي
دا مې درکړې له خپګانه دادې تاسره يادګار وي

څو سپېڅلي شهيدان مې درته پرېښودل په غېږ کې
ډک له ننګ افغانستانه دادې تاسره يادګار وي
ځي له زړه نه مې سرې وينې راشه خال ترې ځانته کېږده
زه چې مړ شومه جانانه دادې تاسره يادګار وي
څو ترخې خاطرې واخله پام چې څوک پرې خبر نه شي
زړه مې تور دى له هر چانه دادې تاسره يادګار وي

څو غزلې څو سندرې خوار ( ساحل) درته ليکلي
او س نو ځي له دې دونيا نه دادې تاسره يادګار وي