د مينې لاروی يمه صنم ته مې وربولي
دا داسې بُتکده ده چې حرم ته مې وربولي

دا زړه راسره رخه لري ځکه خو يارانو
چې چيرته مينه نه وي هغې چم ته مې وربولي
د چا د تورو سترگو د جادو به څه اثر وي
چې هر سهار د ميا او ملا دم ته مې وربولي
چې ستا د خولې خبره مې په شونډو زمزمه شي
يو ښکلی ترنم شي زير او بم ته مې وربولي
نظر مې د رخسار په لارو تورو زلفو ونيو
دا څنگه رڼې لارې دي تورتم ته مې وربولي

ليمو کې يې د ژوند خُمار، خُمار راته کرلی
چرسي بنگي سړی يمه چيلم ته مې وربولي

١٩٩٨/٦/٢٦