طالب جانه ، ټپې
زما په هر لورې سلام دى
چې دريادېږم زما اخله سلامونه
زما پينځه وخته دعا ده
ربه دې باچا کړه چې سلام له دې درځمه
زما د زړه د سر گلابه
همېش دې غم د رژېدو راسره وينه
زما د زړه گلابه راشه
په نورو خلکو پسرلى په ما غمونه
زما د زړه دمه پرې کېږي
د پلانکي خان سترگې دې تل په دنيا وينه
زما د زړه د سر ازغى شوې
د فکر ستن در پسې وړم نه دې موممه
چنگه ملا نرۍ لرې مخ د گل په شان
چال د ښاپېرۍ لرې وژني عاشقان
يا به ارمان راپسې وکې
يا به په چغو چغو وژاړې مينه
يا به مې دا ياري ياري شي
يا به مې سر د دار په سر ټالې وهينه
يا به مې ستا مينه نصيب شي
يا به بېړۍ د جېلخانې وگرځومه
يا به مې ستا حسن روزي شي
يا که نصيب مې د مرگي وي را به شينه
يا به دې زلفې کمربند کړم
يا به زما له وينو ووهې خالونه
يا به زما نصيب خراب وي
يا به دا ټولې يارانې همداسې وينه
وه غنم رنگه لونگ راوړه
ما ته په مينه مينه
ولې دې روغ ځان لېونى کړ
خلک پردې مينې په صبر زړوينه
ولې دې ماته خولگۍ راکړه
اوس مې نو گوره لېونى په وطنونه
ولې دې بل ډيوه مړه کړه
په سود مينه تيل به ما راوړي ونه
ولې په ټپو راته ړوند شوې
شينکي خالونه مې د نيل وهلي دينه
ولې په غټو راته گورې
صورت هغه دى اندېښنو وهلى يمه
ولې به زه ورپسې نه مرم
اشنا مې گل د پسرلي ورژېدنه
چنگه ملا نرۍ لرې مخ د گل په شان
چال د ښاپېرۍ لرې وژني عاشقان
نه گلابي يم نه بدرنگه
زه غنم رنگه يم ځوانان رنځورومه
نه مې ابۍ نه مې داد شته
زه نېزه وړى اباسين راوړى يمه
نه به انځر د ورځې گل شي
نه به اشنا د باران راوړي ديدنونه
نه خو مې دين نه مې دينا شوه
مل مې سودا شوه سرگردان مې گرځوينه
نه دې په خوب کې بشر وينم
نه دې په ويښه سوال ځواب راله راځينه
اوه غنم رنگه لونگ راوړه
ما ته په مينه مينه
مينې دې داسې لېونى کړم
بازار ته لاړم په سودا نه پوهېدمه
مينه دې سيند په کې لاهو شوم
د هجران چل دې راته ماته کړه وزرونه
مينه دې سيند د پشه کال دى
چې ورکوزېږم سر و مال سره مې وړينه
مينه خو تا کړه ما خو نه کړه
نرى نرى به خندېدې ميئن دې کړمه
مينه دې نه ده څه بلا ده
په اندامونو مې خوراک شوه شل يې کړمه
مينه دې نه دى سمندر دى
د غم سلگۍ به زه تر څو پورې وهمه
چنگه ملا نرۍ لرې مخ د گل په شان
چال د ښاپېرۍ لرې وژنې اشقان
دغه لنډۍ ګران نورعلي تسل کمپوز کړي او غواړي چې خپرې شي دا هم د هارون باچا ټپې چې ددې لينک په کليک کولو سره يې اورېدلى هم شئ .
او که ددې لنډيو ډاونلوډ کول غواړئ رايټ پرې کلک کړئ او save target As ته ټس ورکړئ .
