غزل
دومره ظلم ، دومره ظلم جار درباندې نه کوم
نه ؛ زه د لمدو زلفو ګوزار درباندې نه کوم
بل تصوير درلېږمه الله ښېرې به نه کوې
نه جانه تر مرګه انتظار درباندې نه کوم
بيا مې که ستا فون کې د جينۍ خبرې واورېدې
خورم دې ،خورم دې ،خورم دې زه بل کار درباندې نه کوم
لا د شاه ځلمو په شونډو پاړ دی لا ګل نه خاندي
زېری به د دې کال د بهار درباندې نه کوم
لنډ جواب به درکړمه چې نه کيږي بس نه کيږي
نور سفر په دې ازغنه لار درباندې نه کوم
تا د غزل خيال کړمه او ته به مې رسوا نه کړې ؟
نه ؛ د دې خبرې اعتبار درباندې نه کوم
نبيله غزل پېښور
