د هند مشهور سندرغاړى کيلاش خېر وايي چې سندرې د ده د ژوند انځورګري کوي، دى وايي ما ته چې ژوند څه راکړي د هغو تجربو مغز په خپلو سندرو کې ټولنې ته وړاندې کوم.
د بي بي سي د اردو څانګې خبريال سنجيو له نوموړي سره په دې ورځو کې يوه مرکه کړې دا چې د کيلاش خېر سندرې نن نه يوازې په هند بلکې په ټوله نړۍ کې د خلکو پر ژبو دي د همدې ارزښت له مخې مو دا مرکه پښتو ته واړوله هيله ده تاسو ته هم په زړه پورې وي.
_ کله چې ستاو ږغ اورو نو داسې ښکاري چې دا د يوه پاک زړه او سپېڅلې اروا څخه راوځي، دغه ږغ دې څنګه ترلاسه کړى؟
_ ږغ د قدرت ورکړه ده، خو ما په ژوند کې هم ډېر څه زده کړي دي، په ژوند کې مې ډيرې څپېړې پر مخ خوړلي او ډيرې تجربې مې ترلاسه کړي، د تجربو پايلې له اروا سره تړلې دي، له همدې امله چې هر وخت سندره وايم نو داسې خوند کوي لکه کټ مټ چې يې له اروا او زړه څخه وايم، زما د ژوند د خوږو او ترخو هغه مغز زما سندرې دي.
_ داسې ښکاري چې ستا د ژوند په خوږ و-ترخو، خوښي او غم کې دا د غم اړخ زورور دى که څنګه؟
_ داسې خبره نه ده، د هر چا په ژوند کې چې لږ ستړيا او غم راشي، نو سړي ته ډېر مالوميږي، خو زه دواړو ته په يوه سترګه ګورم، تېر کال زما يو البم (کيلاشا) راغى، هغه مهال بلکل ناروغ وم.
د البم د پرانيستنې پر مهال ما ته د اې آر رحمان زنګ راغى ويې ويل چې ته رښتيا ناروغ يې او که نه راځې؟ ما فکر وکړ چې کله د چا وخت وي، نو هره خوا د هغه نوم کښته پورته کيږي، او که دې وخت نه وينو هيڅوک دې په کيسه کې نه وي.
_ نو ستا قسمت څنګه بدل شو؟
_ زه د اتر پردېش ايالت د مېرټ ښار يم، او د ديلي په يوه سيمه ميوروهار کې رالوى شوى ىم، ما ديلي پوهنتون ولوست او په څنګ کې مې موسيقي هم زده کول.خو زه دلته دا ويل غواړم چې موسيقي داسې يو شى دى چې هيڅ يوه اداره يې هم چا ته نه شي ور زده کولاى، موسيقي پيداييشي وي، دا هنر له زېږېدنې سره له چا سره ورسره وي بس يوازې رياضت غواړي.
ما له کوچنيوالي غوښتي چې د فيلمي موسيقۍ پر ځاى يو بل ډول موسيقي زده کړم، چې د هيواد په بېلا بېلو سيمو کې ږغول کيږي او خلک ډېر پام ورته کوي.
ما له ماشومتوبه د ښارونو او کليو محلي سندرو ته ډېر پام کړى، او د دې موسيقۍ د زده کړې مينه او شوق له وخته راسره وو.
_ ستا د هڅو او زيار په وخت کې چا درسره مرسته کړې يانې د هغو ورځو نژدې ملګرى دې څوک دى؟
_ زه به دا ووايم چې تر ټولو لوى مرستندوى مې خداى پاک و، چې هر وخت يې زما لاسنيوى کړى. هغه مهال چې ما په ټولنه کې دخپل ځاى جوړولو هڅې کولې کورنۍ مې ډېره مرسته راسره کړې او زه يې درک کړى يم.
مور مې چې ما ته يې ډېره حوصله راکړې، او همدا حوصله سړي ته طاقت ورکوي، ورور مې مهېش او خور مې نوتن هم زما ډېر مرستندوى وو.
_ تا ته څه وخت مالومه شوه چې ږغ دې له نورو خلکو څخه بېل دى؟
_ کله چې زه د موسيقي د زده کړې لپاره ځينو خلکو ته ورغلم، نو هغوى را ته وويل چې ستا ږغ د کار نه دى، دوى وويل که غواړې چې د موسيقۍ ډګر ته راشې نو د موسيقۍ کومه اله زده کړه، او دا د سندرو ويلو هڅې پرېږده، نژدې دوه کاله مې د ګيټار زده کړه وکړه، کله مې تبله وهله خو تر پايه مې هيڅ شى هم زده نه کړ.
_ ډېر خلک وايي ته چې کوم ډول سندرې وايي، په دې کې له اروا سره يو تړاو شته، يو اروايي تړاو چې په اورېدو يې سړى اراميږي، په دې اړه څه وايې؟
_ هو، دا بيخې سمه خبره ده، ما ته په نيويارک کې زما يو ډاکټر ملګري وويل چې په نړۍ کې ډيرې داسي ناروغۍ دي چې يوازې په موسيقي يې درملنه کيږي. ملګري مې ما ته شاباسى ووايه چې زما موسيقي هم څه دغه ډول ده، زما د موسيقۍ او لفظونو تر منځ داسې يو تړون دى چې سړى فکر کوي يو څوک مې ورغواړي.
_ ستاسو زياتره سندرې صوفيانه انداز کې دي، دا انداز دې ولې وټاکه، او څنګه دې دا پرېکړه وکړه؟
_ ما تر اوسه داسې څوک نه دى ليدلى چې په ځوانۍ کې يې په زړه موسيقۍ ( د هندوانو مذهبي موسيقي) کې نوم ګټلى وي، او ما بايد د خپل مور او پلار په ژوند کې يو څه کړي واى او هغوى ته مې ښودلې واى له همدې امله مې دا صوفيانه انداز او صوفيانه موسيقي وټاکله.
_ تاسو څه وخت خپلې سندرې بازار ته راوييستې؟
_ زه د خپل البم د ثبتولو لپاره ممبۍ ته تللى وم، هلته له دوو کمپوزرانو نريش او هريش سره مخ شوم، له هغو سره په ګډه مې سندرې ثبت کړې، نو زما سره دومره پيسې نه وې چې خپل البم خپور کړم. خوزما ملګرو زما ثبت شوي سندرې په ځينو خلکو واورېدې، هغوى ډيرې وستايلې او ما ته په اعلاناتو کې د سندرو ويلو موکه په لاس راغله. په دې کې ډېر پر مخ ولاړم، وروسته د موسيقۍ لارښود ويشال شېکر زما ږغ واوريدى او زه يې ور وغوښتم، ما دوى ته يوه سندره (الله کې بندې) وويله، دا سندرې چې کله يو کال وروسته بازار ته راغله، نو ډېره بريالۍ شوه او ډېر انعامونه يې واخيستل، تر دې وروسته مې کار لږ څه پر مخ روان شو.
_ ستا د خوښې موسيقۍ تړونګر (موزيک ډايرکټر) څوک دى؟
_ زما د شنکر احسان لواى، ويشال او شيکر، ويشال بردواج کار ډېر خوښيږي، نن سبا سليم سليمان هم ښه موسيقي وړاندې کوي، نريش او هريش مې هم ډېر خوښيږي، چې زما دوه البمونه يې جوړ کړي چې نن د دې سندرو اورېدونکي نه يوازې په هند بلکې په ټوله نړۍ کې ډېر دي.
_ پخپلو فلمي سندرو کې دې کومه يوه ډېره خوښيږي؟
_ د منګل پانډې فلم سندره (تېرا ديوانه هو مولا، تيرا پروانه هو)
_ تمثيل ته دې زړه کيږي که نه؟
_ نه، هيڅکله نه، زما په اند خداى پاک هر وخت ما ته يو کار راکوي، او له کومه وخته چې هندۍ سينما ته راغلى يم، ما ته يې کار پيدا کړى.
_ پر موسيقۍ سربېره دې څه خوښيږي؟
_ ليکنې کوم، د څېرو لوستل مې عادت دى، دخلکو حرکات څارم، خلک د اخبار شوقيان وي، که نه داسې څه شته چې په څېرو کې دې نه وي ليکلي.
_ واده دې کړى دى؟
_ نه تر اوسه مې نه دى کړى، په دې اړه به د کورنۍ مشران فکر کوي.
_ په فلمي نجونو کې دې کومه يوه خوښه ده؟
_ د راني مکرجي فلمونه مې ډېر خوښيږي.
_ دا ګړى په کومو فلمونو کې سندرې وايې؟
_ نچ لې، تيرا نام، بول بوليا، او ون ټو تري
