نن مې د خپلې تنهایۍ
دیرش کلني لمانځمه
پوره دیرش کاله وشوه
چې زه د خدای په دغه لوی اسمان کې
یو ستوری هم نه لرم .
پوره دیرش کاله وشوه
چې د لمر سترګه مې لېدلې نه ده
او له مودو راهېسې
د تورې شپې سره په غبرګ غږ کې
سندرې وایم .
نن دیرش ډېوې پکار دي
چې پرې دلمر د سترګې یاد ولمانځم
ورپسې ډېر خپه یم
که چېرې تاته لمر په مخه درغی
زما سلام پرې وايه
او ورته ووايه چې
زه لاهماغسې بې سېوري یمه
او لا هماغسې لاره ورکی
او بې لوري یمه
که چېرې تاته لمر په مخه درغی
زما سلام پرې وايه
او ورته ووايه چې
زه په خپل سیوري پسې دېر خپه یم
غواړم چې یو ځل مې خپل سیوری پر دېوال ووینم
غواړم چې سیوري ته مې
څو کورنۍ کوترې ځالې وکړيکه چېرې تاته لمر په مخ درغی
زما سلام پرې وايه
او ورته ووايه چې
نن مې د خپلې تنهایۍ دیرش کلني لمانځمه
پوره دیرش کاله وشو
چې زه د خدای په دغه لوی اسمان کې
یو ستوری هم نه لرم
او دادی کلونه وشوه
چې په دې لویه او پراخه مځکه
خپل سیوری هم نه لرم .
۱۳۸۶،تله ، ۱۱ پراګ
