لږه تم شه! ښايي هغه ورځ به راشي
زما او ستا ورکې کوترې به پیدا شي
هېڅ بدرنګه به په ښارکې پاتې نه وي
او مجنون به موده پس له صحرا راشي
هغه ورځ چې د خوماردور به تېروي
ملنګان به ځای ځاي ناست وي بنګ به ډېر وي
سیندبه ستایوې خوږې خندا په څېر وي
هلکان به له ربابه راچاپېر وي
داسې ورځ چې اندېښنه به لېونتوب وي
د هر لفظ مانابه بشپړ مئینتوب وي
تر سبا به کنډولې د بنګو ویشي
تښتېدلی له ساقي څخه به خوب وي
د ادېوان به له ېوې څېرمې ګونګي وي
ښاپېرۍبه مېلمنې دغره د رود وي
دهرچا به پوره زر سندرې زده وي
او مچکه به تر ټولو وړ سرود وي
دظالم پاچا به ورانه پاچايي وي
په هرڅه به بس د حسن واکمني وي
ربابي به د دربار په منځ کې ناست وي
او وزیر په ځنځیرونو کې بندي وي
هغه ورځ به واړه ښار یو ټپه وي
داټوپک او څوکېدار به پکې نه وي
بې ځنځیره به د هر کور دروازه وي
او کلپونه به نو هېره افسانه وي
لږه تم شه ښايي هغه ورځ به راشي
زما او ستا ورکې کوترې به پیدا شي
هېڅ بدرنګه به په ښارکې پاتې نه وي
او مجنون به موده پس له صحرا راشي
