ستا د محبت په دايره کې را ايسار يمه
تکه توره شپه ده، توره شپه کې را ايسار يمه
ما نه به د تګ او پرمختګ پوښتنه نه کوې
زه خو لا د ځمکې په کُره کې را ايسار يمه
زه لکه د خداى کتاب رښتينى تفسير نه شومه
بس د يو پښتون جومات تاخچه کې را ايسار يمه
ما نه نو زړه ولې لکه وړانګو الوته غواړي
زه خو د مرغۍ غوندې پنجره کې را ايسار يمه
ګوره بلا خلک مې د تورتم له زړه را وويستل
خپله لکه تيلو په ډيوه کې را ايسار يمه
