پر کلي کله کله باد او باران يو ځای راشي
لکه مين ته چې غماز او جانان يوځای راشی

څه ښه تصوير جوړ کړي چې لاس کله در وغځوم
ستا ښکلو سترګو ته موسکا او خپګان يو ځای راشي

د انتظار تنده مې هېڅ مازيګر ماته نه کړه
په ما دغره په څېر سپرلی او خزان يو ځای راشي

ښکاري لا هم پر موږ د تورو تيارو زړه يخ نه دی
چې مو جونګړې ته برېښنا او توپان يوځای راشي

خدای خبر ستا به وي رښتيا او که ددروغو غوسه
خو د شمسزي زړه ته يقين او ګومان يوځای راشي