جره ، مجرد ، او تجريد ، دا عربي کلمې دي او د يواځې او تنها معنا لري.
پښتانه وايي چې احمد تجريد شوى، معنا ورسره خلکو خپلې اړيکې پرې کړي او يواځې شوى .
د افغانستان په اصطلاح کې مجرد ناواده کړي ته وايي چې ميرمن يا ښځه نه لري يواځى گڼل کيږي .
د تجريد معنا تصوراتولپاره او عادي يواځې لپاره پرخپل خپل ځاى هم کاريږي.
شاعر تل له يواځيتوب شکايت کوي ، او په يواځيتوب کې ښه آو بد تصورات هم پيدا کيږي .
تجريد ښاغلي علي محمد خان اپريدي د خپل شعري جونگ ( ټولگې) ته نوم غوره کړى دى هم په همدې سرليک يې يو نظم په دې شعري کتاب کې شته .
وايي
نيمه شپه ده تنهايي ده او ليونتوب دى
نو په دې نيم بيتي سره يې د تجريد د کلمې معنا وکړه يعنې په نيمه شپه کې تنها يا يواځې يم
داسې يوازې يم
چې
نسکور پروت يم دشعوره له انتشاره
يم وتلى د هستۍ له کارو باره
په تصور کې وايي
د درد منو د ښپو پلونو ته وژاړم
چې سپرلى درومي گلونو ته وژاړم
بيا وايي
پاتې شوې مې اوس کار نه دى له هوشه
خوښ يم نن سبا بيخي خود فراموشه
بيا وايي
ژونده بس که نور دې گوره د تاب نه يم
درته نه شمه کتلى قصاب نه يم
بيا وايي
زه دمينې په لټون کې سرگردانه
له دې نوره مې محروم نه کړى اسمانه
که مې وژغورې له دغه لويه تاوانه
سر به نه پورته کوم ستا له احسانه
بيا په يواځې ځان محبت ته غږ کوي
ژوند الزام دى محبته چې ته نه يې
لوى ناکام دى محبته چې ته نه يې
تور ماښام دى محبته چې ته نه يې
خالي جام دى محبته چې ته نه يې
نو چې يواځې شو تجريد شو، نو بيا يې پر محلونو اوغوره بنگلو يې هم پروا نه وي .
مرمرينې منارې او محلونه
هيبناکې قلاګانې بورجلونه
د زر دار د ماڼۍ دنگ دنگ ديوالونه
بې د مينې بې نمکه بې سکونه
دا وه د تجريد د کلمې معنا او په همدې کتاب کې ورته نغوته (اشاره ) وشوه.
بله دا چې ښاغلي علي خان په عربي او فارسي ژبو ښه پوې دى د همدوې په خبره پرې ښه عبور لري ځکه په دې شعري ټولگه کې عربي او فارسي کلمې يې ډيرې کارولى دي کلاسيکه شاعري يې ښه لوستې ده او د شعر په ټولو اړينو ارونو ( لوازماتو) پوه دى.
پرغزل کې يې تغزليت شته د ټولنې بدۍ اونورو دودونو ته يې په ښه ډول اشاره کړې ده .
په دره کې کارو بار تورې ټوپکې
د علي لاس کې گلونه کتابونه
ځواني که تېره شوه د مينې روزگار اوس هم کوم
هره خبره کې خبره د يار اوس هم کوم
څه جرم نه کوم که سوال کوم د خپلې بقا
په جنگ مجبور يم خو د امن پر چاراوس هم کوم
د پښتو ملک دى خوچې ستا همځولې وگورمه
ترينه تپوس دې غلى غلى په ډار اوس هم کوم
ښاغلي علي خان ته دې نوى کتاب( تجريد ) مبارک وي.
که څه دا پر ٥٠٠ روپى دى خو ماته يې وړيا پر ډالۍ کې راکړ ترې مننه .
