زهير شينواری
                         دموسسې مرسته !
په کلي کې اوازه شوه چې يوه موسسه ، ليونيانو ته نغدې پيسې د مرستې په توګه ورکوي .هر سهار به د کلي د ملک د کور تر مخ لوي کتار ولاړ و، هر يوه به ادعا کوله چې زه سم سوچه ليونی يم . ملک هم د هغوي نومونه په لست کې ليکل ،خلکو بيروبار ورځ په ورځ زياتيده ، يوه ورځ د کلي خان راغی او د ملک نه يې غوښتنه وکړه چې د هغه نوم هم د ليونيانو په لست کې داخل  کړي . ملک دهغه غوښتنه ونه منله او ورته ويې ويل :
 په دې ټول کلي کې له تاسو نه هوښياره کورنی نه شته ، نو څنګه ستاسو نوم په ليونيانو کې وليکم ؟
خو خان دا خبره نه منله او ادعا يې کوله چې موږ له نسله نسله خانداني ليونيان يو او د خپلې ادعالپاره يې په محکمه کې جوړه شوی شرعی وثيقه هم د ملک تر مخ وغوړله .
ملک مجبور شو چې د هغه نوم هم د ليونيانو په لست کې شامل کړي . په دې توګه د ټول کلی اوسيدونکي دليونيانو په ډله کې وليکل شوو.