ملګرو دغه نظم هاغه مهال د الجابر جلال په مستعار نوم خپور شوی و ، هيله ده بخښنه راته واکړئ. جلال امرخېل
پام
وار دې خطا نه شي
له مرګ نه ونه ډار شې
ته نه مرې
ته د ژوند ملګری شوې ، ژوندی پاتې شوې
ته د نمرود سترګو کې مات لکه ازغی پاتې شوې
ستا شهامت ته سلام
ستا له جذبې نه شم قربان او ستا جرات ته سلام
تا د نړۍ د مليونونو انسانانو قاتل
د افغانانو ، عراقيانو قاتل
تا د خدايۍ دعوه کوونکی
د يوېشتمۍ پېړۍ
فرعون ذليله کړلو
ای د موسی عليه السلام ملګريه !
د ابراهيم د حقې لارې لارويه ياره !
تا د تاريخ پاڼې بدلې کړلې
تا هغه سر چې تر اسمانه يې ځان جګ ګڼلو
د دې نړۍ له هر انسانه يې ځان جګ ګڼلو
ان چې د خدای له نوم ، نښانه يې ځان جګ ګڼلو
تا هغه سر
خپلو بوټانو ته راښکته کړ ، ذليل دې کړ
نوی فرعون و ، غرک په نوي رود نيل دې کړ
د ابرهه د لښکر ملا ماته شوه
څو پېړۍ وروسته ور په ياد چې ابابيل دې کړ
تا '' سپي '' ته '' سپی '' ونه وې ، تا لاس کې ائېنه ورکړله
هو ، د بوټانو ائېنه
چې خپل تصوير په کې په خپلو سترګو ښه وويني
دنيا پوهيږي چې سپی جنګ خوښوي ، جنګ جوړوي
ښه شوه چې تا ټولې دنيا ته سپی وروپېژانده
جنګ خوښوونکی
ترهګر
جنګ جوړونکی سپی
او د انسان د وينو څښونکی سپی
که لاس دې مات
که دې پښتۍ ماتې شوې
وار دې خطا نه شي
ته نه مرې
ته د ژوند ملګری شوې ، ژوندی پاتې شوې
يو منتظر که مړ شي سل نور به دنيا ته راشي
ستا قاتلان به بيا د چا او چا چوپتيا ته راشي ؟؟
ته مجاهد شوې ، تا جهاد وکړ تا ګټه وکړه
ته که بندي هم شې
که لاس ، که دې پښتۍ ماتې شي
ته
که مړ هم شې
نو
ته نه مرې ته ژوندی پاتې شوې
تا حق وينا وکړه ، تا ګټه وکړه
ته د تاريخ په پاڼه پاڼه نوميالی پاتې شوې
او ....
ستا قاتل د مليونونو عراقيانو قاتل
د افغانانو قاتل
او د زرګونو
فلسطينيانو قاتل
په داسې مرګ مړ شو
په داسې شرم باندې وشرمېده
چې د ژوندون هر ورپاتې شېبه
او هره ساه به لکه مرګ تېروي
د خپل اته کاله خدايېۍ په دې وروستۍ ورځو کې
په داسې شرم باندې وشرمېده
چې تصور کې به يې هم نه راته
داسې ډالۍ
داسې تمغه دې ورکړه
او يوه داسې ائېنه دې ورکړه
چې هر ساعت به په کې ځان ويني
تصوير به خپل د '' سپي'' په شان ويني
هغه دې مړ کړ
په داسې مرګ دې مړ کړ
چې د ژوندون دغه ورپاتې شېبې
او هره ساه به لکه مرګ تېروي
خو
ته نه مرې
ته د ژوند ملګری شوې ، ژوندی پاتې شوې
ته د نمرود سترګو کې مات لکه ازغی پاتې شوې
د ازادۍ په هر ګلبڼ لکه سپرلی پاتې شوې
د ابراهيم د حقې لارې لاروی پاتې شوې
