دمــــــــارچ ۲۸مــه
ويــــــكټور هوګو
زړګۍ ! غوښتې دې ؤ چې څو کرښې درته ولیکم ، مګر نه پوهېږم چې دڅه دلوستلو هیله به و لرې ، او هغه به څه وي چې لا تراوسه مې زر ځله درته نه وي ویلي یا مې درته نه وي لیکلي ؟ آیا زړه دې غواړي چې بیاهم درته ووایم چې مینه درسره لرم ، خوبیا هم نه یم خبر چې خبرې او جملې به دزړه د پټو او له رازونو ډکو خبرو د ښکاره کولو او ژباړلو توان ولري او که نه ؟ که ووایم چې له ځان او ژوند څخه راته ګرانه یې بیا به مې هم کومه لویه خبره نه وي کړې ځکه ته ښه پوهېږې چې زه خو ژوند او ځان ته له سره ارزښت نه ورکوم ؛نو ښکاره ده چې بیا به وايې درناوی مې نه کوې او ارزښت نه راکوې .
هوکې ! څوځله باید ووایم چې که راته ګرانه او ارزښتناکه نه وای هېڅکله به مې زړه نه وای درکړای او ژوند او ځان به مې ویړیا درڅخه نه وای جار کړی ؛ تردې هخوا ولې به دې هم درناوی او قدر نه کوم ؟ خیرکه بیاهم زمونږ دواړو څخه کوم یو ګرم ، ناوړه او ملامت وي پرته له شکه چې هغه به زه وم او ته به نه وې .
زه له دې نه وېرېږم چې ناوړه او ګرم مې وبولې ځکه باور لرم چې په سپېڅلي او بې آلایشه زړه به مې خبره وې. آه ! زه ځان ستا دژوند ملګری بولم نو یواځینی کس چې له له دې نېکمرغۍ څخه مې بې برخې او بدمرغه کولای شي هغه به ته وې .
اې زړګۍ ! شاوخوا څه کیسې دي؟ آیا ملګري او دوستان دې ملامته او ځوروي ؟ هیله کوم چې ما پرې خبر کړه ؟
زړه مې ډېر غواړي چې ستا له پاره یو کار ترسره کړم چې ته پرې خوشاله شې ، ته څه خبره یې چې زړه مې غواړي که د ژوند له ټولو سختیو او کړاونو سره سره یواځې دیوې ورځې له پاره ستا دژوند دمهربان اوښه ملګري په توګه پاتې شم په سبا یې حاضریم چې په ډېرې خوښۍ له نړۍ او ژوند څخه سترګې پټې کړم .
ځینې به ښايي زما په دې ارمان پورې وخاندي او ما به ملامت کړي مګر هېڅوک دا توان نه لري ځکه یوه ورځ په خوښۍ ژوند کول په بدمرغۍ کې له ټول عمرژوند څخه ښه دی .
ګرانې او مهربانې ! لږخو زما په اړه فکروکړه او چورت ووهه لکه څه ډول چې زه ستا په اړه فکرکوم . ای کاش پوهېدلای چې څومره راباندې ګرانه یې ؟ داسې کاربه نه وي چې ستا له پاره یې ترسره نه کړم ؛ تل هڅه کوم چې ستا سره دګډ ژوند لاښه وړتیا پیداکړم ؛ نوپه دې صورت کې خو به ډیره بده او نادوده وي چې خپله مینه راڅخه ودرېغوې .
راشه چې له یوې بلې څخه دې خبره کړم ؛ هغه دا چې له دې وروسته ته د جنرال هوګو لوریې ، هغه کار چې له شان سره دې نه ښايي مه یې کوه ، چاته اجازه مه ورکوه چې نوم دې په خواره او سپکه ژبه واخلي او په بدو سترګو درته وګوري . ددې جملو په لوستلو سره کېدای شي احساس وکړې چې زه دخپل پلار په نوم او مقام نازېږم او له غرور څخه کار اخلم خو خدای شاهددی چې ماته ستا له مینې پرته بل سپېڅلی او دویاړ شی نه شته نو هغه مهال به سرلوړی او ویاړلی وم چې ته راسه مینه وکړې . الله دې مل شه ، لا تراوسه مې آته مچوګانې درباندې پور دي مګر فکر کوم چې په خپله ژمنه به وفا ونکړې .
ستا ویکټور
***
