دچا یوې وعدې ته زړه نا زړه وتلی یم
باران کې مجبورۍ نه له کاله وتلی یم
اوس ګورم تنهایۍ کې ژوند کولی شم که نه ؟
زه شوخ وری رمې نه د شپانه وتلی یم
یارانو خفه نه شئ نور بنډار دی رانه پاتې
دا  اوس هم له هغې نه په بانه وتلی یم
په نیمه شپه په ( سره لیکه ) اسمان سره غږېږ.م
آخر مسلمانۍ نه زه په څه وتلی یم ؟
چې لاس د مینې راکړي نو ما لاس ته شي راوړی
د ګل له غېږې زه لکه وږمه وتلی یم
ازاد یم خو ښکاریان په هر قدم دي راپسې
قفس نه د حالاتو یو مارغه وتلی یم
اسمانه دادې خوښه وه هم داسې دې غوښتل
جنت نه دغنم په یوه دانه وتلی یم
یو فن راسره شته چې پردي زړونه خپلوي
اوبو غوندې هر کور ته په ویاله وتلی یم
2009  مارچ  14
    پېښور
............................................................................................................................ .................

سره لیکه :  ( Hotline )  دټیلی فون ځانګړې اړیکه چې یوازې
د دوو کسانو تر منځ پکې خبرې کیږي .