عجیب وخت شو یو ملا بل ملا وژني
هغه هم يي خاص د خدای په رضا وژني
د مسجد، محراب، ممبر ویجاړي څه کړې
چې ملا او مقتدي په بیا بیا وژني
چې پرون يي د لمانځه په سر وژل کړل
نن لمونځغاړې په لمانځه په دعا وژني
د تقوا او پارسايۍ دعوه يي هیڅ ده
چې پخپل لاس متقي او پارسا وژني
دین یو لوبه شوه د څو فرقو ترمنځه
نن به دی او دی به هغه سبا وژني
زموږ ملک په یو داسې بلا واوښت
چې ناشنا خلک پاڅیږي اشنا وژني
ځیني وايي مکړه، پریږده، بده نه ده
چې بهر بلا د کلي بلا وژني
نه د خپل نه د پردي ملا نه خیر شته
دې کې خیر دی چې یو بل په رڼا وژني
زه حیران یمه د وخت دې انتقام ته
چې غلط سړی په خپله ګنا وژني
شعروزمه خیالونه