اې د ادم او د حوا لمسیه!
دغه سپوږمۍ دغه ښایستوکې سپوږمۍ
«د رڼا ګانو مور ده»
د غریبانو د انګړ ډېوه ده
او دا د ښکلي رب د نور جلوه ده
نور دې ته مه ورخېژه!
ځکه چي ستا په زړه کي
دبدمرغیو تخم ځای نیولی
ها چي شیطان نومیږي
:::::::
زه ډېر وېرېږمه چي خدای نه خواسته
ته هلته هم د بدبختیو کروندې جوړي کړې
هلته هم ویني توی کړې
هلته هم بیا د د خپل نیکه قابل کیسه تکرار کړې
هلته هم څلي د سرونو جوړ کړې
خدای مه کړه داسي وسي
چي د سپوږمۍ دغه چاودلې سینه، تاب را نه وړی
چي په خپل ښکلې سپینه غېږه کي د وینو ویالې
او د سرونو قصابي وزغمي
خدای مه کړه داسي وشي
چي :
د مرګ او ژوبلي شیطاني تخمونه
او دسرو وینو ویالې
ددې لامل وګرځي
چي دغه سپینه سپوږمۍ
خپله رڼا وبايلي.
::::::::
اې د ادم او دحوا لمسیه!
دغه سپوږمۍ دغه ښائستوکې سپوږمۍ
د دوو میینو و ساکت محفل ته ساه ور بخښي
ددې سپوږمۍ په دې رڼه رڼا کي
د راز و نیاز هغه پټ خُلي مجلسونه کیږي
چي میينان په وسیله د سترګو یو او بل ته
له یوه زړه څخه وبل زړګي ته
د خپل خبرو راکړه ورکړه کوي
خدای مه کړه داسي وسي
چي :
د میینانو د خبرو دغه راکړه ورکړه
دا چي په سترګو کیږي
نور د پای ټکي ورته کښې ښودل سي
نورالباري افغانمل