تا په خدای باندې سپارمه،درنه ځمه
بس یو وار دې ښکلومه،درنه ځمه
د ژوندون او د ځواني غوندې به ځغلم
نور صنمه،تا پریږدمه،درنه ځمه
که هر څومره منتونه راته وکړې
درنه ځمه،درنه ځمه،درنه ځمه
دا په ما باندې دې کومه بلا کړې
ټوله ورځ درته راځمه،درنه ځمه
په والله چې زړه مې چوي،زړه مې چوي
ستا له غمه،له ستمه،درنه ځمه
ته به راشې مابه بیرته درپخلا کړې
په دې هیله په دې تمه،درنه ځمه
چې ته نه یې نو په دې دنیا به څه کړم
بس ګوهره درنه مرمه،درنه ځمه
انعام الله ګوهر