په دغه هیواد کې د میانمار زرګونه شمیر مسلمان روهنګیايي کډوال له څو کلونو راپدیخوا میشت دي، خو اوس د تایلینډ حکومت د ناراجستره کډوالو د نوي قانون په عملي کیدو سره ښايي ډیری دغه کډوال محاکمه او یا هم له دغه هیواده وشړل شي.

د تایلینډ حکومت خبرداری ورکړې چې د روان میلادي کال د جون میاشتې تر دیرشم تاریخه باید تایلینډ کې میشت ټول بهرني کډوال او کاریګر خپل ملي هویت تصدیق کړي، ترڅو هغوی وکولې شي د نوي قانون سره سم په دغه هیواد کې اوسیدولو او کار کولو ته ادامه ورکړي.

همدارنګه دغه هیواد ویلي که چیرې بهرني کډوال او کاریګر په دغه کار کې پاتې راغلل، نو هغوی به ناقانونه کډوال وګڼي او د نغدي جریمي سره سره هغوی به له تایلینډ څخه هم وباسي.

خو په ورته وخت کې د بشري حقونه یوه ډله وايي، چې د میانمار حکومت په تایلینډ کې میشتو خپلو مسلمان وګړو ته د اسنادو له ورکولو انکار کړې، چې له همدې امله زرګونه شمیر دغه کډوال نشي کولې تایلینډ کې خپل ملي هویت تثبیت کړي.

دغه ډله وايي، د میانمار حکومت په دې برخه کې له خپلو مسلمانو وګړو سره چې ډیری یې روهنګیایان دي، سیستماتیک تبعیضي چلند کوي او هغوی ته د اسنادو له ورکولو څخه ډډه کوي.