په مانوس ټاپو کې یو تن پناه غوښتونکي ځانوژنه کړې

د مانوس ټاپو سیمه ایز پولیس وايي د تیرې چهارشنبې په ورځ یو تن روهنګیايي پناه غوښتونکي د یوې خواشینوونکې پیښې له امله ساه ورکړې.

پولیس وايي دغه مړینه تر ډیره ځانوژنه ښکاري چې د ورځې په ۱۱ بجو رامنځته شوه، کله چې یاد روهنګیايي شخص د کډوالو له هستوګنځي څخه د دغې ټاپو ښارګوټي ته لیږدول کیده.

د مانوس ټاپو د پولیسو قومندان ډیویډ یاپو وايي د دغه پناه غوښتونکي جسد یې سیمه ایز روغتون ته انتقال کړې او دا مهال پولیس په دې اړه له یو شمیر نورو پناه غوښتونکو سره خبرې کوي چې د دغه بد مرغه پیښې عیني شاهدان دي.

نوموړي همدارنګه وویل، زه غواړم د دغه کس کورنۍ ته تسلیت وړاندې کړم. دا داسې یوه پیښه وه چې مونږ یې ټول حیران کړو.

د یو راپور په حواله، د استرالیا د حکومت لخوا مانوس ټاپو ته د پناه غوښتونکو له انتقال راپدیخوا، یاد کس اووم پناه غوښتونکې شو چې دغه ځای کې ځانوژنه کوي.