ناسم قضاوت
سپین ږیری د خپل ۲۵ کلن زوی سره اور ګاډي ته پورته شو. ټول مسافر په خپلو خپلو سیټونو کې ناست و . اور ګاډی حرکت وکړ...
د اورګاډي له حرکت سره سم ۲۵ کلن ځوان چې د اورګاډي له ښیښې سره ناست وو، شور او زوږ جوړ کړ. خپل لاس يې د اورګاډي له ښیښې نه بهر کړ او په داسې حال کې چې محرکه هوا يې په ډېر خوند لمس کولو، ويې ویل:
- پلاره! وګوره! ونې روانې دي.
سپین ږیري په خوشحالۍ سره خپل زوي نازاوه.
د ځوان ترڅنګ یوه زوانه میرمنه او د هغې خاوند ناست ول چې د زوي او پلار خبرې يې اورېدلې او د ځوان حرکاتو ته حېران ول . ځوان یو ۵ کلن ماشوم ته ورته حرکات سرته رساوه.
ناڅاپه ځوان بیا چغې کړې:
- پلاره! وګوره! سیند، حیوانات او وریځې له اورګاډي سره حرکت کوي.
ښځه او خاوند يې ځوان ته په ډېرې زړه سواندۍ سره کاته. باران په ورېدو شو. د ځوان په لاس د باران څو څاڅکې پرېوتې. هغه په ډېر خوند سره د باران څاڅکي لمس کړې او بیا يې چغې کړې:
- پلاره! وګوره! باران اوري. زما پر مخ د باران څاڅکې راپرېوتې.
د ځوان سره ناسته ښځه او خاوند نور نو صبر نشو کولای، له سپین ږیري نه يې پوښتنه وکړه:
- ولې مو زوي د درملنې لپاره روغتون ته نه وړې؟
سپین ږیري ځواب ورکړ:
- مونږ همدا اوس له روغتونه ستانه شولو. نن په ژوند کې په لومړي ځل زما زوي کولای شي نړۍ وویني!
اخلاقي پایله: مخکې لدېنه چې د یوې موضوع په اړه په هرڅه پوه شو، نتیجه ګیري او قضاوت کول به عادلانه نه وي.
ژباړن: شیرین اغا جهانګیر
۱۰ سنبله ۱۳۸۹
۱ سپټمبر ۲۰۱۰
د صفا راډیو اداره، جلال آباد
