نوې څیره

ته خو هماغه پخوانې یې زه دې ښه پیژنم
ما اوس ته نه شې غولولې په بدله څیره

ته مې د تن، ته د وجود او د شناخت دښمن یې
ولې په ځمکه دې زما نه خښوله څیره؟

ته د خندا، اې د خوښۍ، اې د مستۍ دښمنه
نه یې هغه چې به زما دې ژړوله څیره؟

ته د ایرو یې سوداګر ته خو اورونه پلورې
ځکه خو زما دې په لمبو کې سوزوله څیره

د هیڅ رواج او د هیڅ دود پروا دې کړې نه ده
تا مو د پیغلو په حجاب کې شرموله څیره

اې ددستار او دلونګۍ، اې د غیرت تجاره
چې په پردو دې خرڅه کړې ده دا خپله څیره

ته ازاري یې بس همداسې به کړیږې ته تل
ولې دې زما د خویندو میندو ځوروله څیره !

مونږ ته معلوم یې ځکه اوس درته چمتو ولاړ یو
نه یو هغه چې به پر تا مو تیروتله څیره

اوس دې په مخ کې کلک ودریږو د خپل سر په بیه
نور هغه نه یو چې له تا مو اړوله څیره

رحیم هغه نه دې چې ځان درته بخښلې و ټول
تا به د بل په لمسون ترېنه شوکوله څیره