د مئ د مياشتې درېمه نيټه په ټوله نړۍ كې د رسنيو د ازادۍ د ورځي په توګه نمانځل كيږي. مقصد دادى، چې  په يوه خوله د ژورناليزم په وړاندې د پرتو خنډونو د لرې كولو غوښتنه وشي. په نوره نړۍ كې د دې كار لپاره ډېري هلې ځلې كيږي او اوسمهال د نړيوالو رسنيو په وړاندي پراته خنډونه تر ډېره بريده لرې شوي هم دي، خو په دې سيمه كې لا هم ژورناليزم له بې شمېره ستونزو سره مخ دى. سږ كال هم د دې ورځې په مناسبت وويل شو، چې د اسيا وچي د سږ كال په اوږدو كې هم د ژورنالېستانو په وړاندې د پرتو ستونزو له امله  په نړۍ كې لومړى مقام تر لاسه كړ. په بيلابيلو اسيايي هېوادونو كې ژورنالېستان له بې شمېره ستونزو سره مخ وو. د اسيا په وچه كې تېر كال څلوېښتو تنو ژورنالېستانو خپل ژوند له لاسه وركړ. حيرانكونكې د اده، چې له دې وروسته په دويم مقام كې د امريكا وچه ده، چې متحده ايالات يي تر هر چا د رسنيو دازادۍ زياتې ډنډورې وهي. په امريكا كې هم دوه دېرش تنه ژورنالېستان له ژوند نه بې برخي شوو. نن سبا  خپلواك ژورناليزم د يوې ټولنې د پرمختګ په لړ كې خورا مهم شمېرل كيږي. هر هغه چا، چې دغه حقيقت يي درك كړى دى د ژورناليزم په وړاندې د خنډ جوړيدو په ځاى يي د دې دودې او له زيړ ژورناليزم نه په يوه رښتيني او معياري هغه باندې د دې داړولو په لړ كې هڅه او هاند كړي. د رسنيو د نړيوال انسټيټيوټ په وينا د دوه زره او يولسم كال په اوږدو كې په نړيواله كچه ۱۰۱ تنه ژورنالېستان ووژل شوو. د دغې اداري د چارواكو په وينا له ثبت شويو ارقامو سره سم له ۱۹۹۰ م كاله راهيسې د په نړۍ كې د ژورنالېستانو لپاره تر ټولو خونړى كال و. بله خوا دا هم دمنلو ده، چې د رسنيو د خپلواكۍ په نارو سورو كې ځينې وخت د رسنيو او ژورنالېزم مسئوليتونه له پامه غورځول كيږي. په دې لړ كې هم بايد ډېر دقت وشي، چې د نورو د نقالۍ په شوق كې رانه خپل ارزښتونه هېر نه شي. له بده مرغه داسې هم ليدل كيږي، چې ځينې وخت د ژورنالېستانو په نوم ځينې مطلب پرستان داسې كړنې كوي، چې له امله يي سم او ناسم ټول په يوه سيند لاهو كيږي.