دهيواد په سويل کې دناټو دوه سرتېري وژل شوي

ناټو د افغانستان په سويل کې دخپلو دوو پوځيانو د وژل کېدا خبر ورکړی. دغه خبره په کابل کې دناټو د مطبوعاتي دفتر مسوولينو تائيد کړې او ويلي يې دي چې دوی د خپلې تګلارې له مخې د وژل شويو پوځيانو هويت نشي ښکاره کولی.

ديادې شوې سرچينې په وينا دغه پوځيان يې تېره ورځ په سويل کې دماين په يوه چاودنه کې وژل شوي.

که څه هم ناټو د پېښې کره ځای او د پوځيانو هويت نه دی ښکاره کړی خو وسله والو طالبانو د هلمند په مارجې او کرمسير ولسواليو کې په بېلابېلو نښتو کې د ګڼ شمېر امريکايي او انګليسي پوځيانو دوژلو ادعا کړې.

د طالبانو دمسوول مقام په وينا ددوی وسله والو تېره ورځ په يادو شويو ولسواليو کې پر بهرنيو ځواکونو څو ځايه بريدونه کړي چې په ترڅ کې يې ګڼ شمېر پوځيان وژل شوي او د هغوی څو عرادې پوځي موټر له منځه وړل شوي.