د متحده ایالاتو د مهاجرت چارواکو د ولسمشر ټرمپ د اجرایوي فرمان نه وروسته د استرالیا په مانوس او نایرو توقیف خونو کې د بندي پناه غوښتونکو مرکې تر یو نامعلوم وخته ځنډولي.

د پناه غوښتونکو د تبادله کولو دغه هوکړه د استرالیا د لمړي وزیر مالکوم ټرنبل او د امریکا د پخواني ولسمشر اوباما ترمنځ شوی وه، خو د ښاغلي ټرمپ د مهاجرینو پر وړاندی اوسنې سخت دریځ داسی ښکاره کوي چې دغه معامله به سر ونه نیسي.

هغه خوا بیا د استرالیا د بهرنیو چارو وزیرې جولي بېشپ او د مهاجرت وزیر پیټر ډوټن رسنیو ته په بېلا بېلو ځاینو کې ویلي چې دغه تړون به خامخا عملي کیږي.

د تېرې شنبې په ورځ د استرالیا په اډیلاد او کانبیرا ښارونو کې په زرګونو مظاهره کونکي او د کډوالو د حقوقو مدافعین راټول شوي وو. دوی د استرالیا له حکومته د مانوس او نایرو د توقیف خونو د بندولو او پناه غوښتونکو ته په استرالیا کې د ځای ورکولو غوښتنه وکړه.

د دواړو هیوادونو ترمنځ په دغه لانجمنه سیاسي معامله کې اصلي قربانیان بیا هغه په زرګونو افغان او د نورو هیوادونو کډوال دي چې د ډیرو ستونزو وروسته استرالیا ته د ښه ژوند په هیله تللي، خو د کلونو راهیسې په توقیف خونو کې بندیان دي او لا یی هم برخلیک نامعلوم دی.