مغلګۍ او پنجاب
د ۱۹۴۹ کال د جون په ۱۲ مه، د پنجاب یوې جنګي الوتکې د خوست ولایت د مغلګۍ سیمه بمبارد کړه. په دې پېښه کې یو شمېر ملکي کسان او د پوستو سرتېري ووژل شول. د پنجاب د پوځي یرغل په وړاندې د هغه مهال د شاهي حکومت کابېني اضطراري غونډه وکړه او یوه اعلامیه یې که څه هم غښتلې نه وه، خپره کړه. په اعلامیه کې راغلي« داسې معلومات موږ ته راسېدلي چې د کرښې پر لورې پاکستانی پوځ د حرکت په حال کې دی او د افغانستان حکومت په دې اړوند پاکستاني لورې ته خپل توند اعتراض او پروټیست وړاندې کړی او غوښتي یې دي، چې خپل لښکر دي بیرته پر شا وګرځوي، له دښمنانه کړنو دې لاس واخلي او د شوي بمبارد او د هغه د عواقبو مسولیت دي هم ومني». د مندې ګک په اړه رسنۍ زیاتوي چې« د پورته خبر تر خپرېدو وروسته افغان دولت د ځينو هېوادونو د پوځي اتشو سره یو ځای بمبارد شوې سیمې ته سفر وکړ، ساحه یې له نږدې وکتله او هلته یې د پاکستاني الوتکو لخوا د لوېدلو انګلېسي بمونو ټوټې پيدا او په کابل کې خلکو ته وښودلې. پر پاکستان د نورو هيوادونو فشارونه هم راوړل شول، بیا ګډ پلاوی وټاکل شو او بالاخره پاکستان د برید پړه پر غاړه واخیسته او ویې ویل، چې د هغوی الوتکې سهوا افغان خاورې ته ننوتې او هلته یې لویې قبایلي وسله والې ډلې چې ګمان کېده، د پاکستاني غاړې به وې، لیدلي او بیا یې بمبار کړي دي.
په پایله کې پاکستان د وژل شويو افغانانو خونبها ورکړه او ستونزه په دې ډول حل شوه.»
اوس یو ځل بیا پنجابي ډرونونو او جنګي الوتکو د خوست ولایت د ګوربزو ولسوالۍ د مغلګۍ سیمه بمبارد کړه او هلته یې د یوې کورنۍ لس تنه شهیدان کړل. د دې کورنۍ یو مشر وایې«وژل شویو کې یوه وریندار، اووه ورېرونه او دوه لمسیان دي. نوموړی وایې: د شپې خبر شو چې د ورور پر کورنۍ یې برید شوی. بې بې سي»
د دې تر څنګ په همدې شپه د کونړ ولایت په یو کور بمبارد شوی، کور ړنګ شوی او یو ملکي تن شهید دی. اخوا څو تنه ملکي کسان نور هم په پکتیکا ولایت کې د دې شپې په بمباریو کې ټپیان دي.
د افغانستان په پلازمینه، کابل ښار د روان کال د اکتوبر تر ۹ مې بمبارۍ وروسته، دا د افغانستان پر حریم د پنجاب د جنګي الوتکو څووم برید دی چې ترسره کېږي. د افغانستان پر خاوره له دې بمباریو داسې ښکاري چې پنجاب نیغ په نیغه کابل سره تودې جګړې ته زړه ښه کړی. که څه هم لکه پر مغلګۍ د ۱۹۴۹ کال پشان بمبارد چې اسلام اباد هغه مهال دا خپله تېروتنه منلې وه او د شهیدانو خونبها یې ورکړې وه؛ پر مغلګۍ، پکتیکا او کونړ ولایت د تېرې شپې له بمبارد که پنجاب بیا انکار کوي، خو د شهیدانو جنازې نه شي پتولای!
د پاکستان د پوځ ویاند شریف چودري نن له خبریالانو سره په خبرو کې ویلي، پر افغانستان یې برید نه دی کړی او د دوی ستونزه د افغانستان له خلکو سره نه، بلکې د افغانستان له حکومت سره ده.
د پاکستان وسله والو ځواکونو اړوند ایکس پاڼې او پاکستاني رسنیو د چودري له قوله لیکلي، «زموږ پالیسي د ترهګرۍ پر ضد ده.»
خو د ماشومانو، میرمنو او ملکي کسانو وژل او د ولسي وګړو د کورونو بمباردول، افغانانو سره له ښکاره دښمنۍ پرته، بل څه کېدای شي؟
دا چې د پنجاب د جنګ وزیر خواجه اصف ښکاره او علني وایې چې افغانستان مو دښمن دی، تر دې د دښمنۍ څرګند اعلان نور څه کېدای شي؟
بلخوا د بشري حقونو نړیوال بنسټ یا IHRF په یوه خبرپاڼه کې ویلي،« تېره شپه د پاکستان پوځي ځواکونو د افغانستان پر کونړ، خوست او پکتیکا ولایتونو یو لوړ هوايي بریدونه کړي دي.»
کابل ته پکار دی چې د پنجاب د بریدونه په وړاندې چې د مخامخ جګړې معنی لري، د افغانانو لویه جرګه جوړه کړي. په دې جرګه کې د پنجابي تیري او یرغل او هېواد ته د نورو پرتو ستونزو په اړه د افغانانو سلا او مشوره ترلاسه کړي. جرګې چې هره پرېکړه وکړه د هغې د پلیتوب لپاره دې افغانان په ګډه ودرېږي. که افغان ملت په ګډه د پنجاب د تیري او یرغل په وړاندې رادمخه نشي په یوازې ځان کابل نه شي کولای د پنجاب د یرغل په وړاندې لکه څنګه چې ښای پریکنده او غوڅ ځواب ورکړي.
ټول او هر څه د پنجاب په وړاندې یوه جبهه کې!
د ۲۰۲۵ کال د نومبر ۲۵ مه
سرلوڅ مرادزی
