انجنير ستانه مير زهير
ډيسل ( DSL )
DSL د ( digital subscriber line ) کلمو لنډيز دی.
ډيسل د کورونو، دفترونو او ادارو د عادي تليفونو له لارې ، د انټرنيټ سره دتړلتيا امکانات برابره وي .دغه تړلتيا د عادي موډيمونو پرځای د ځانګړو موډيمونو په وسيله ترسره کيږي چی د DSL دخدمتونو وړاندې کونکي شرکت يې د ډيسل دفعالولو په وخت کې د خپلو مشتريانوپه واک کې ورکوي .
د ډيسل ښې ځانګړتياوې دادي :
-
کله چې انټرنيټ فعال وي تليفون ته زنګ راتللی شي او بې له دينه چې انټرنيټ قطع شي ، د مقابل لوري سره خبرې او مکالمه کولی شو .
-
نوي لين غځولو ته اړتيا نه وي د تليفون دموجود عادي لين څخه استفاده کيږي .
-
د عادي موډيمونو په پرتله يې ، د انټرنيټ سرعت او چټکتيا څوڅو ځلې زياته وي
د ډيسل له لارې د ډيټا د ليږد راليږد وړتيا په هغې فاصلې پورې اړه لري چې د مشتري ( کارن ) او د ډيسل د وړاندې کونکي شرکت تر منځ شتون لري .هر څومره چې دا واټن کم وي په همغې اندازه د انټرنيټ چټکتيا زياته او د ډيټا د ليږد راليږد وړتيا هم زياته وي .
خو ځنې نيمګړتياوې هم لري چې هغه يې په دې ډول دي .
- په هر ځای کې ورنه ګټه نه اخيستل کيږي .
- د ډيټا د لاس ته راوړلو وړتيا يې د ليږد په پرتله زياته وي . يعنې همدغه يو غير منطقي توازن يې نيمګړتيا ده .
- هر څومره چې د ډيسل د خدمتونو دوړاندې کونکي شرکت څخه واټن زياتيږي ، په همغه اندازه يې د انټرنيټ سرعت يا چټکتيا هم کميږي .
ددنيا په زياتو کورونو او ادارو کې ، مشتريان عموما ديو نا متقارن ( جدا ) ډيسل
(digital subscriber line Asymmetric ) څخه ګټه اخيستل کيږي چې لنډيز يې ( ADSL ) دی . ADSL لاس ته راوړونکی فرکانس په يوه ليکه ويشي څو د انټرنيټ مشتريان د ډيټا د لاس ته راوړو او ليږد وړتيا ولري.
په دې ډول ډيسل کې د ډيټا د ترلاسه کولو و وړتيا د ډيټا د ليږد په پرتله څو څو ځلې زياته وي يعنې د معلوماتو د لاس ته راوړلو ليکه د ليږد په پرتله درې يا څلور ځلې چټکه او ګړندۍ وي .
ADSL له دوو ځانګړو دستګاو څخه ګټه اخلي. يوه يې د خپلو مشتريانو په سيمه او بله دستګا يې د ډيسل د خدمتونو د وړاندې کونکي شرکت د تليفونونو د ISP له پاره ځای په ځای کيږي .
د انټرنيټ د مشتريانو په سيمه کې DSL د يو ټرانسيور نه ګټه اخلي چې عام خلک همدې ټرانسيور ته دډيسل موډيم وايي خو د تليفون متخصيصين او مسلکي کسان يې ATU -R بولي . همدا وسيله د مشتري د کمپيوټر او د ډيسل د شبکې ترمنځ اړيکي ټينګوي .
همدا رنګه د ډيسل شرکت د ډيسل د Access Multiplexer نه هم ګټه اخلي چې د کلمو لنډيز يې
( DSLAM ) دی . دا دستګاه د ډيسل د شرکت په مرکز کې ځای په ځای وي او د انټرنيټ د مشتريانو له پاره ځانګړي خدمتونه چمتو کوي .
يو وخت د ADSL ټکنالوژی په ډيرې چټکۍ وده کوله ، د سپوږمکيواو د عادي موډيمونو له لارې ، انټرنيټي خدمتونو د برابرونکو شرکتونو سره په ستره سيالۍ اخته و. د ځنو پخوانيو احصايو له مخې په ١٩٩٩ م کال په امريکا کې په ٣٣٠٠٠٠ کورونو او ادارو کې د ډيسل له خدمتونو ګټه اخيستل کيده .په هغه وخت کې دا وړاند وينه هم شوې وه چې دغه ارقام به د ٢٠٠٣ م کال په ورستيو کې ٩٣٠٠٠٠٠ کورونو او ادارو ته پورته شي .
په اوسني وخت کې د ADSL سرعت او چټکتيا په يوه ثانيه کې ١،٥ ميګا بايټه اټکل شوې ده خو .دتيورۍ له پلوه هلې ځلې روانې دي چې دغه سرعت په ثانيه کې ٧ ميګا بايټه ته پورته شي .په دې برخه کې څيړنې هم شوی او د VDSL په نامه د ټکنالوژي يوه طرحه تر کار لاندې ده .
