تېمورشاه يوسفزی 

که څه هم وینډوز ایکس پي په استدلالي ډول دوینډوز له لړۍ څخه  ترټولو ډېر د اطمینان وړ او ثابته نسخه ده ؛  خو په دې سربېره بیا هم کامله نه برېښي .

دوخت په اوږدو کي به تاسو ته جوته سوې وي  ، چي ددې نسخې په کارولو سره بیا هم دیو لړ ستونزو سره مخ سوي یاست ؛ دې ډول ستونزو دله منځه وړلو او یاهم کمولو لپاره مورچل ویب پاڼه ترخپل وسه  کوښښ کوي ، چي تاسو ته یو لړ مطالب پرلیکه کړي .

د نه ځوابورکونکي  پروګرام تړل- لومړی  

بعضي وختونه داسي وي چي یو پروګرام دکمپيوټر د ضعف والي او یاهم کوم بل لامل په وجه دتړل کېدو څخه انکار کوي ؛ که داسي واقع سي ، تاسو کولای سئ هغه پروګرام په اجباري توګه د Task Manager  په کارولو سره وتړئ .

۱:-  په یوه وخت د Ctrl، Alt او Delete تڼۍ له کیبورډ څخه کښېکاږئ ، ترڅو تاسو ته د Windows Task Manager کړکۍ خلاصه کړي .

۲:- د Application   ټوپ کلیک کړئ .

۳:- د نه ځواب ورکونکي  پروګرام پر نوم کلیک وکړئ .

۴:-  د Task Manager   له لاندنۍ برخي څخه د End Task تڼۍ ته دموږک په ذریعه زور ورکړئ .

۵:-  که ستونزمن پروګرام  سم دلاسه ونه تړل سو ، د Program Not Responding په نوم پيغام دیوې کړکۍ په څېر درته ښکاره کوي ، له دې کړکۍ څخه د End Now پر تڼۍ ټک وکړئ .

۶:-  که په دې سربېره هم پروګرام ونه تړل سو، او یاهم وینډوزپر ځای ولاړ پاته سو، خپل کمپيوټر  ګل (مړ) او بیرته چالانه  کړئ .

 

دنه حذفېدونکي فایل حذفول

بعضي اوقات فایلونه خیرن او ککړ په وایروسونو سي ، چي وینډوز ایکس پي ئې له حذفولو څخه مخنیوی کوي  ؛ او یو پيغام چي په ترڅ کي ئې لیکل سوي وي ( دغه فایل چي تاسو ئې حذفول غواړئ اوسمهال داستفادې لپاره تري کاراخیستل کیږي ) ښکاره کوي ؛ که څه هم تاسو  خپل کمپيوټر ګل او بیا ئې چالانه هم  کړئ ، دحذفولو په وخت کي  به ورته پيغام درته ښکاره کړي .

ددې لپاره چي وینډوز اړ باسئ چي دغه ډول فایلونه حذف کړای سي ، دغه لاندي ګامونه اوچت کړئ .

دعمومي فایلونو دحذفولو لپاره :

۱:- ټول هغه فایلونه ، پروګرامونه او پوښۍ وتړئ ، چي اوسمهال دکمپيوټر پرصفحه خلاص لیدل کیږي .

۲:- خپل کمپيوټر ګل او بیرته چالانه  کړئ .

۳:-  وینډوز ته ستون او دفایل دحذفولو کوښښ وکړئ .

۴:- که بیا هم  یادسوی فایل حذف (Delete) نه سو ، خپل کمپيوټر ګل کړئ .

۵:- خپل کمپيوټر چالانه او سم دلاسه  له کیبورډ څخه د F8 تڼۍ څو ځله  کښېکاږئ ترڅو تاسو ته دWindows Advanced Options   مېنوراښکاره سي .

۶:-  د کیبورډ څخه د پورته او کښته علایم دارو    تڼیو (Arrow Keys)  په کارولو سره Safe Mode انتخاب او دEnter تڼۍ ته زور ورکړئ .

۷:-  بله صفحه کي تاسو ته دغه پيغام ( Please select the Operating System to start) ښکاره کوي ؛ که تاسو خپل سولګر (کمپیوټر) باندي یو وینډوز انسټال کړی وي، نو د Enter تڼۍ ووهئ ؛ که له یو څخه زیات وینډوزونه او یاهم چلیزسیستمونه (Operating Systems) انسټال سوي وه ، نو اړیاست چي د علایم دارو تڼیو په کارولو سره وینډوز ایکس پي انتخاب او د Enter تڼۍ ووهئ .

۸:-  وینډوز څو سافټ ویرونه لوډوي (Load) ، چي یوه او یاهم دوې دقیقې وخت نیسي ، داستاسو په سیستم پوري ارتباط پیداکوي ، چي دوینډوز څه ډول نسخې موپه کمپيوټر انسټال کړي دي ، لږ وروسته تاسو ته د ننوتلو یوه کړکۍ ښکاره کوي ، هوري خپل یوزر او ورسره که پسورډ ولري ، ټایپ اوبیا د Enter تڼۍ  ووهئ .

۹:- د Safe Mode یو پيغام تاسو ته ښکاره کیږي ، چي پري لیکل سوي وي ، اوسمهال ستاسو سیستم دSafe Mode وینډوز په حالت کي چالانه دئ ، دمخته تګ لپاره د Yes تڼۍ باندي کلیک وکړئ .

۱۰:- تاسو د Safe Mode   سبک څخه هم د عام وینډوز په څېر کاراخیستلی سئ ، اوس هغه نه حذفېدونکی فایل انتخاب او د حذفېدو کوښښ ئې وکړئ .

۱۱:-  که تاسو په دې کاربریالي سواست ، خپل کمپيوټر ګل او عام وینډوز ته ستون سئ ؛ که بیاهم ستاسو دغه کوښښونه بریالي ونه ختل ، دهغه کس څخه چي دوینډوز په  هکله ډېره تجربه لري مرسته وغواړئ .