خوشحال بابا
الياس ټلوال
څښتن د تورې او څښتن هم د قلم وو خوشحال
کۀ يو شاعر او يو اديب وو غازي هم وو خوشحال
هم په يو ځان باندې بيل ځان ته يو عالم وو خوشحال
دښمن دپاره سخت مشکل او يو لوئې غم وو خوشحال
يو لوئې عالم او ښۀ حکيم هم فلسفي وو خوشحال
يو ښۀ جرنېل يو ښۀ سالار يو ښۀ ښکاري وو خوشحال
يو ښۀ تورزن او مړنے او کلک پښتون وو خوشحال
يو ښۀ تهذيب يو ښۀ ائين يو ښۀ قانون وو خوشحال
هم جالينوس هم ارسطو هم افلاطون وو خوشحال
د ننګ ناموس او د غېرت کامل مضمون وو خوشحال
لوړ شخصيت ښۀ انسانيت او لوئې عظمت وو خوشحال
ښۀ شرافت ښۀ صداقت ښۀ سعادت وو خوشحال
صحي معنو کښې هم پښتون دے پېژندلے خوشحال
د پښتونخوا په هره سيمه ګرځېدلے خوشحال
لکه شاهين په لوړو غرونو الوتلے خوشحال
لکه زمرے په هر مېدان کښې جنګېدلے خوشحال
شان د اورنګ ورته سلام کړو داسې شان وو خوشحال
يو لوئې مرکز د شجاعت په دې جهان وو خوشحال
په تار د شعر کښې پېئلې مرغلرې خوشحال
د ملغلرو په شان کړي دي خبرې خوشحال
په پښتو ژبه دوړولي دي شکرې خوشحال
دي غوړولي په پښتون خپلې وزرې خوشحال
د غليمانو لۀ يلغار ئې بچ ساتلے پښتون
د عظمتونو په مينار ئې خېژولے پښتون
چې عام و خاص ته وه پسند داسې وېنا وه خوشحال
په هر يو ځائې چې خورېده داسې رڼا وه خوشحال
چې به هر ځائې ته رسېده داسې هوا وه خوشحال
چې ټول وطن وو پرې ښائسته داسې ښکلا وه خوشحال
داسې رڼا وه تورو شپو هم ورکولے نشوه
داسې هوا وه لويو غرو هم ټېنګولے نشوه
پښتنې مور يو کلک پښتون وو زېږولے خوشحال
د ژوند درياب کښې د خودۍ ګوهر موندلے خوشحال
لکه د نمر د ننګ اسمان کښې ځلېدلے خوشحال
لکه د تندر په مغلو غورځېدلے خوشحال
مغلې مور نن خپل بچي ته دا تکرار کولو
ځويه! خوشحال وو سخت سړے سخت ئې ګزار کولو
عظيم شاعر عظيم اديب او ښۀ انسان وو خوشحال
لوئې سخنور فېض رسان شيرين بيان وو خوشحال
يو مهربان يو نګهبان او يو پاسبان وو خوشحال
يو راهنما او يو رهبر او يو کاروان وو خوشحال
يو لوئې طاقت يو لوئې قوت او لوئې محنت وو خوشحال
د زمري خلۀ کښې کړو حرکت داسې همت وو خوشحال
يوه دبدبه يوه هنګامه يوه مرتبه وه خوشحال
يو ښۀ ژوندون يوه هستي يو سلسله وه خوشحال
يو بېداري او يوه چغه يوه نعره وه خوشحال
يوه هستي يوه مستي يوه جذبه وه خوشحال
داسې جذبه وه چې مړۀ زړونه ئې راژوندي کړي وو
داسې شمله وه چې تاجونه ئې سلامي کړي وو
يو سړيتوب يو مېړنتوب او يو نرتوب وو خوشحال
يو زلميتوب يو مئينتوب او يو ځوانتوب وو خوشحال
يو خودداري يو انسانيت وو او يو رعب وو خوشحال
ورک وو خوبونه ئې لۀ دښمن داسې يو خوب وو خوشحال
يوه سيلۍ يوه زلزله او يو طوفان وو خوشحال
يوه دنيا او يو مخلوق او يو جهان وو خوشحال
هم وو خټک هم وو بنګش هم اپريدے وو خوشحال
هم يوسفزے هم ګګياڼے هم شنوارے وو خوشحال
هم محمدزے هم داودزے هم اورکزے وو خوشحال
هم معصود هم وو وزير هم بنوڅے وو خوشحال
خوشحال زما وو هم د ستا هم د هر چا وو خوشحال
غرض مې دا دے چې د ټولې پښتونخوا وو خوشحال
