"د بازاري خوراکونو کالوري دې کمه شي"
د ماشومانو له چاغښته د مخنیوي په موخه په انګلستان کې حکومت غواړي هغو خوراکونو کې چې اوسمهال یې کالوري ډېره ده لږه کړي. دې کې پیتزا، برګر او خوړو ته چمتو نور خوراکونه راځي.
د روغتیا د برخې چارواکي وايي دا ګام ځکه باید پورته شي چې په انګلستان کې خلک هره ورځ له ۲۰۰ تر ۳۰۰ اضافي کالوري مصرفوي.
له دې ګام سره به په راستورانتونو، مغازو او د بازاري خوراکونو دوکانونو کې د څښاک او خوراکي تولیداتو اندازه کمه شي او په موادو کې به یې هم بدلون راشي.
- "هره ورځ هکۍ خوړل د ماشومانو قد لوړوي"
- د خوږو او بورې خوراک -بايد نیم کم- شي
- هغه سینګار چې روغتیا ګواښي
ټاکل شوی هدف به د انګلستان د روغتیا د وزارت له خوا په یوه کال کې ترلاسه شي.
تمه کېږي چې په لومړي سر کې دغه پلان په داوطلبانه ډول پلی شي خو که داسې ونه شي، د حکومت د سلاکارو اداره وايي، دوی به یې په قانون کې ځای کړي.
په ځینو خوراکونو کې څومره کالوري شته؟ | |
---|---|
په یوه برګر کې چې پنیر لري | ۲۶۰ کالوري |
په ۱۰ اېنچ پیتزا کې | ۸۸۰ کالوري |
د اشو په ۴۰۰ ګرامو کې | ۲۴۴ کالوري |
دا ګام په خوراکي توکو کې د مالګې د کمولو تر یوې لسیزې بریالي پروګرام وروسته پورته کېږي.
تېر کال د ماشومانو له چاغښته د مخنیوي په موخه د ماشومانو په خوراکونو کې د بورې د کمولو پروګرام د خوراکي توکو پر صنعت فشار راووست چې په ځینو خوړو کې د بورې شتون تر ۲۰۲۰ کاله ۲۰ سلنه کم کړي.
- د ژوند ترخې تجربې "کولای شي ماغزه څلور کاله زاړه کړي"
- 'د میندوارې ښځې خوراک ماشوم د زړه له ناروغۍ ژغورلی شي'
- ایا کولی شئ "چاغ خو صحتمند" اوسئ؟
څوک څومره باید وخوري؟ |
---|
د یوه لارښود په ډول، یو نارینه د ورځې نژدې ۲۵۰۰ کالوري ته اړتیا لري |
یوه عادي ښځینه، نژدې ۲۰۰۰ کالوري ته اړتیا لري |
د نورو لاملونو ترڅنګ، دا اندازې له عمر، د بدن له لویوالي او فزیکي فعالیت سره اړیکه لري او بدلېدی شي |
د ښوونځي زده کوونکو ماشومانو ته لارښوونه دا ده چې د ۱٫۶۰۰ او ۲٫۵۰۰ کالوري ترمنځ مصرف کړي |
سرچینه: د برتانیا روغتیايي خدمتونه |
په نوي پلان کې په بازارونو کې خرڅېدونکو خوږو څښاکونو بدلون هم شامل دی.
ګازلرونکي خواږه څښاکونه د روغتیاپالو له انده صحي نه دي او څومره چې شونې وي باید لږ وڅښل شي. ماشومانو ته د ګازلرونکو څښاکونو څښل د مشرانو پرتله ډېر تاوان درلودلی شي.