د نړۍ په ګڼو ښارونو کې د فلسطینیانو په ملاتړ لاریونونه شوي
داچې پر غزه تړانګې اسرایلي پوځ خپل ځمکني او هوايي عملیات پراخوي، له فلسطیانیانو سره د ملاتړ په موخه د شنبې پر ورځ په سلګونه زره خلک د اروپا، منځني ختیځ او اسیا په ښارونو کې په لاریونونو راوتلي ول.
په دې لړ کې تر ټولو ستر لاریون د لندن هغه وو چې شمېر یې ان تر ۷۰ زره زیات ښودل شوی دی. دوی د برېتانیا حکومت له صدراعظم رشي سونک څخه د اوربند غوښتنه کوله.
پر دې مهال یوې لاریون کوونکې کامیلا ریوولتا وویل، "دمګړۍ د نړۍ سترقدرتونه کافي هڅې نه کوي. ځکه خو موږ دلته راوتي وي. موږ د اوربند غوښتنه کوو، موږ د فلسطینیانو لپاره د حقونو غوښتنه کوو. د ژوندي پاتې کېدو غوښتنه کوو، د بشري حقونو غوښتنه کوو. "
د دې وینا وه، "موږ د حماس لپاره نه یو راوتلي. موږ د فلسطینیانو ژوند ژغورنه غواړو. "
له واشنګټن سره د همغږۍ په سبب د سونک حکومت هم د اوربند غږ لا نه دی کړی خو د غزې ولس ته د بشری مرستو پرېښودو لپاره په جګړه کې د تعطل راوستلو ملاتړ کوي.
برېتانیا د اکتوبر پر اوومه نېټه د جنګي ډلې حماس تر بریدونو وروسته د اسرایل د خپلې دفاع د حق ملاتړ وکړ. پر اسرایلو په هغه یرغل کې ۱۴۰۰ کسان وژل شوي ول چې اکثریت یې عادي وګړي ول.
بلخوا د حماس تر ولکې لاندې د فلسطین روغتیا وزارت د شنبې پر ورځ په خپل ورځني راپور کې ویلي، چې درې اونۍ وړاندې په غزه کې له پیل شویو اسرایلي هوايي بریدونو د مړیو شمېر ۷۶۵۰ ته ختلی دی، په وژل شویو کې ډېر یې عادي خلک دي.
لوېدیزو حکومتونو او ددغو هیوادونو اکثریت وګړو یې د حماس بریدونو له کبله له اسرایل سره کلک ملاتړ او خواخوږي ښودلې ده، خو د اسرایلو عکس العمل بیا په مسلمان هېوادونو او په خاصه توګه په عربي هېوادونو کې سخت غوسه راپارولې ده.
د مالیزیا په پلازمېنه کوالا لمپور کې هم د امریکا سفارت مخې ته یو لوی لاریون وشو.
په ترکیه کې هم یو ستر لاریون د دغه هېواد په پلازمېنه استانبول کې وشو. د دغه هېواد ولسمشر رجب طیب اردوغان لوېدیځ قدرتونه د غزې په تړانګه کې د فلسطینیانو د "وژلو اصلي عاملین" وګڼل چې د اسرایل د پوځ له خوا وژل شوي دي.
ولسمشر اردوغان په استانبول كې د سلګونو زرو فلسطيني پلويانو په غونډه كې وويل:"په غزه كې د قتل عام اصلي مقصر لوېديځ دي. "
سره له دې چې د نړۍ بېلابېلو اسلامي هېوادونو پر غزې تړانګې په تېره بيا پر ملکي وګړو د اسرایل بريدونه غندلي، خو دا لومړی ځل دی چې د يو اکثریت مسلمان هېواد ولسمشر په مستقيم ډول لوېديځ قدرتونه د غزې په تړانګه کې د خلکو په وژلو تورنوي.
د عراق په پلازمېنه بغداد او تر اسرایلي ولکې لاندې لوېدیځه غاړه کې لاریونونه وشول. احتجاج کوونکو په جهاني کچه له اسرایلي توکیوسره د پریکون یا بایکاټ غږ وکړ.
بل پلوه په یوشمیر اروپايي هیوادونو کوپنهېګن، روم او سټاکهولم کې هم ګڼ خلک واټونو ته په احتجاج راوتي ول.
د فرانسې په ځینو ښارونو کې د جګړې له پیل راهیسې پر لاریونونو بندیز لګول شوی دی، دوی ویره لري داسې نه چې مظاهرې ټولنیزه ترینګلتیا راوپاروي. خو له بندیزونو سره سره د شنبې ورځ په پاریس کې ځینې واړه لاریونونه راوتي ول.
د نیوزيلنډ په پلازمېنه وېلینګټن کې هم په زرګونو خلکو فلسطیني بیرغونه راخیستي ول او پر لوحو یې د ازاد فلسطین شعارونه لیکلي ول. مظاهره کوونکو ددغه هیواد تر پارلمانه مارش وکړ.
د لندن د شنبې لاریون پر مهال د اسرایلي سفارت خوا او شا سیمې تر ځانګړي محدودیت لاندې وې. د پولیسو د اټکل له مخې د لندن لاریون کې څه نا څه ۷۰۰۰۰ کسانو ګډون کړی وو. د تېرې اونۍ په لاریون کې نږدې ۱۰۰۰۰۰ کسانو برخه اخیستې وه.
فورم \ دبحث خونه