روس د نېټو تر غونډې مخکې د اوکراین پر اوډیسه او کیف ښارونو ډرون بریدونه کړي
واشنګټن ــــ د اوکراین پوځ په لیتوانیا کې د نېټو سرمشریزې تر پیلېدو څو ګنټې مخکې وویل، چې روسي ځواکونو نن سهار د اوډیسه پر جنوبي بندر او مرکزي ښار کیف باندې 28 کامیکاز ډرون بریدونه کړي دي.
نن د لیتوانیا په ویلنیس ښار کې د نېټو دوه ورځنۍ سرمشریزه غونډه پیلېږي چې د امریکا د صدر په ګډون د دې اتحاد ټول مشران ور رسېدلي او ټاکل شوې چې له نورو مسایلو سره سره به پکې پر دې موضوع بحث کېږي چې څنګه پر اوکراین د روس د بریدونه مخه ونیول شي.
د اوکراین هوایي ځواک وایي هوایي دفاعي سیسټم یې د شاهد په نوم د ایران جوړې هغه 26 ډرون ویشتلي او را غورځولي دي چې روس ور ویشتلي وو.
چارواکي وایي پر اوډیسه بندر باندې 22 ډرون ور ویشتل شوي وو او دوو پکې د بندر انتظامي ودانۍ ویشتلې ده.
د اوډیسه ایالت ګورنر اولیه کایپر د ټیلیګرام له لارې په خپل پیغام کې ویلي، چې د برید له کبله اوډیسه بندر ته نیژدې د غلو دانو یو ځای او یو بل ټرمینل اور اخیستی خو وایي ژر بیرته وژل شوی او کوم زیان او مرګ ژوبله یې نه ده اړولې.
د اوکراین پوځي چارواکي وایي د پایتخت کیف خواته چې کوم ډرون ور ویشتل شوي وو ټول یې را غورځولي خو وایي د تباه شویو ډرون الوتکو ټوټو یو شمېر کورونه زیانمن کړي دي.
د کیف د پوځي انتظامیې مشر سرهي پوپکو پر ټیلیګرام باندې پخپل یو پوسټ کې ویلي، "دښمن په دې میاشت کې په دویم ځل پر کیف هوایي برید وکړ".
رویټرز خبري ایجنسۍ ته د اوکراین د پایتخت کیف اوسېدونکو عیني شاهدانو ویلي چې د هوايي بریدونو په مهال یې د هوايي دفاعي سیسټم په څېر داسې ږغونه واورېدل چې د ډرون د بریدونه مخه نیسي.
مرکزي ښار کیف ته د نیژدې سیمې یو پوځي مشر روسلان کراشینکو پر خپل فیسبوک لیکلي، چې د کیف په شاوخوا سیمو کې د 12 د خلکو د استوګنې کورونه او یوه څو منزله ودانۍ د ویشتل شویو ډرون الوتکو د ټوټو له کبله لږ زیانمن شوي دي، خو وايي چاته پکې څه زیان نه دی رسېدلی.
پر اوکراین د روس د یرغل اوس تر 500 زیاتې ورځې کېږي خو لا داسې نه ښکاري چې ژر دا جګړه تم شي. په دې جګړه کې د اوکراین په زرګونو خلک وژل شوي، په میلینونو بې ځایه شوي او ګڼ ښارونه یې زیانمن شوي دي.
یادونه:- د دې رپوټ معلومات له رویټرز خبري ایجنسۍ اخیستل شوي.
