پښتون هنرمند محمد قوي خان په حق رسېدلی
د پاکستان د ټيلي ويژن ډرامو او فلمونو ياد پښتون هنرمند محمد قوي خان د 80 کالو په عمر کې د ورپېښې ناروغۍ له امله په کېنېډا کې په حق رسېدلی دی.
د پاکستان سرکاري خبري ادارې [رېډيو پاکستان] د قوي خان د مړينې خبر ورکړی چې هغه د کېنسر په ناروغۍ اخته وو.
قوي خان وي او اې ډيوه سره په يوه ځانګړې مرکه کې ويلي وو چې د "هغه د پښتنو د يوسفزو قبيلې سره تعلق دی او د خېبرپښتونخوا په مرکزي ښار پېښور کې زېږېدلی، هلته یې زده کړې او په یو بېنک کې یې کار کړی بيا د هلته نه په1961 لاهور ته تللی او لومړی کار یې د رېډيو څخه پېل کړی وو".
هغه ويلي وو په پاکستان کې چې ټي وي راغلو هغه د ټي وي لومړی هيرو وو، هغه بيا په رېډيو، ډرامو او فلمونو کې ډېر کار کړی دی، او د پاکستان حکومت ورته ګڼې جايزې ورکړې وې.
نوموړي ويلي وو، د زرګونو په شمېره کې ډرامو او تهېټرو او 250 پورې فلمونو چې يو پکې [د پښتو فلم وو] کې یې کار کړی او مشهوره ډرامه یې "اندهېرا اجالا" وه.
کراچۍ ارټس کونسل د قوي خان په مړينه د خفګان څرګندونه کړې او ويلي یې دي "د هغه خدمات به تل ياد ساتل کيږي او قدر به یې کولی شي".
هغه ویلي وو، د هنرمندۍ په خدماتو یې د نشان امتياز، لايف ټايم اچيومنټ اېوارډ، ستاره امتياز او نور ډېر اېوارډونه ګټلي وو.
د پاکستان صدر عارف علوي او وزیراعظم شهباز شريف هم د قوي خان په مړينه د خفګان څرګندونه کړې ده.
د محمد قوي خان سره وي او اې ډيوه څو کاله وړاندې ځانګړې تفصيلي مرکه کړې هغه پکې د خپل ژوند، د پېښور، باړې د اوبو د يادونو، پښتو فلم، سندرو او د ژوند په ګڼو يادونو خبرې کړي، په لانديني لنک کې ليدی او اورېدی شئ
