ټرمپ او پوټین د شمالي کوریا پر کړکېچ ټیلیفوني خبرې کړي

د انځور حقوق AFP

د امریکا ولسمشر ډونلډ ټرمپ د شمالي کوریا پر وضعیت له خپل روسي سیال ولادیمير پوتین سره ټیلیفوني خبرې اترې کړې دي.

د کرملین ماڼۍ خبرپاڼې له مخې، دواړو مشرانو په کوریا ټاپووزمه کې د اټومي کړکېچ پر هواري او د څو نورو کړکېچنو سیمو پر وضعیت له یو بل سره غږېدلي دي.

سپینې ماڼۍ هم په خبر پاڼه کې ویلي، دواړو خواوو د شمالي کوریا د "خطرناک وضعیت" د پای ته رسولو لپاره پر همکارۍ ټینګار کړی دی.

په خبر پاڼه کې دا خبره هم شوې چې ولسمشر ټرمپ ښاغلی پوتین له دې وستایه چې د امریکا اقتصادي کړنلاره یې ستایلې وه.

ښاغلي پوتین د پنجشنبې په ورځ په مسکو کې د کلني خبري کنفرانس په ترڅ کې د ښاغلي ټرمپ اقتصادي لاسته راوړنې وستایلې.

نوموړي وویل، موږ د لاسته راوړنو شاهدان یو، د بازارونو ودې ته وګورئ، دا "د پانګونې په برخه کې" د ډونلډ ټرمپ پر کړنلاره د پانګه والو د باور ښکارندويي کوي.

ولادیمیر پوتین پخپلو خبرو کې د امریکا په ولسمشریزو ټاکنو کې د روسیې لاسوهنه یو ځل بیا رد کړې ده.

* روسیه، ایران او ترکیه د سوریې د سولې کنګره جوړوي

* پوتین: د ټرمپ مخالفان'له روسیې سره د اړیکو خیالي کیسو' سره امریکا ته زیان اړوي

* له سوریې د روسیې ځینې ځواکونه وځي