د ژوند پيغام
خيال كې مې بيا نوې نندارې ښكاري
اخ دا خو د ژوند مظاهرې ښكاري
رنګ د تحول كړه كائنات بدل
خدايږو بڼ كې نوې مشورې ښكاري
دشت بيا دلاله په وينو رنګ شولو
خدايه دا د چا د زړه قطرې ښكاري
ناز او تبسم مې د غوټۍ وليد
ژوند يې ماته ټوكې مسخرې ښكاري
دا چې مې د زړه د وينو رنګ نه دى
وايه! په څه ستا منګولې سرې ښكاري
خدايږو حريفان به بيا نېشه كاندې
داسې كه زما مېنې سپيرې ښكاري
څومره چې دې زلفې سلسلې لري
هومره ولولې زما اسرې ښكاري
خيال كې چې بجلۍ د فكر بله كړم
ژوند مې لانيمګړى يو په درې ښكاري
كاشكې تحول سره بدل شمه
ګوندې را په سرخاورې ايرې ښكاري
پاڅيږه سيلابه حركت وكړه
بيا ترو تازه شاړې مېرې ښکاري
