مور ګلې!
زما لپاره دې منلي تكليفونه
مور ګلې! عمر دې ډير شه
رادې كړې پۍ په مينه مينه
د خپلې سينې
څومره دى وچه كړله وينه
د خپلې سينې
زما په غم كې دې ګاللي شو ګيرونه
مور ګلې! عمر دې ډير شه
تا اللو كې راښودلې
وفا او مينه
ستا په شودو كې مارودلې
وفا او مينه
تا لا زانګو كې راكول د ننګ درسونه
مورګلې! عمر دې ډير شه
هره شيبه هوسيدلې
زما لپاره
لكه د شمعې بليدلې
زما لپاره
زما سلګۍ سره تا كړي فريادونه
مور ګلې! عمر دې ډير شه
تا په خوږه ژبه روزلم
په مينه مينه
تل دې په غيږ كې ګرزولم
په مينه مينه
ستا نه قربان شم ما په تا كړي نازونه
مور ګلې! عمر دې ډير شه
تا چې په ډير ناز لويولم
وطن لپاره
د ژوند په خوند دې پوهولم
وطن لپاره
د وطن مينه مې كړي وينه كې ټوپونه
مور ګلې! عمر دې ډير شه
تا پسې دويمه مور ګڼمه
دا ښكلى وطن
چې ورنه ځان قربانومه
دا ښكلى وطن
په خپلو مټو جوړوم په كې باغونه
مورې ګلې! عمر دې ډير شه
مورې د نوي ژوند نشو كې
يو زيرى كوم
د جمهوريت په پلوشو كې
يو زيرى كوم
آبادوم د ګران وطن سپيره ډاګونه
مور ګلې! عمر دې ډير شه
ستا آرمانونه اوس رژېږي
مورجانې زما
لويه آرزو دې پوره كېږي
مورجانې زما
د وطن شاړې به كړي ستا بچي ګلونه
مور ګلې! عمر دې ډير شه
