د منتخب اسلامی جمهوريت بنسټونه او ارزښتونه

د افغانستان د راتلونکې په اړه ناټو د دفاع وزیرانو مهمه پرېکړه

میرویس
06.06.2013

ګرانو وطنوالو، اسلام علیکم
د ناتو د غړو ملکنونو ددفاع وزیرانو د افغانستان د مسئلې پر امنیتي اړخ باندې په خپله غونډه کې دا سې فیصله کړیده:
======
د ناټو دفاع وزیرانو په بروکسل کې د افغانستان په اړه د خپلې دوه ورځنۍ غونډې په وروستۍ ورځ له ۲۰۱۴ وروسته په افغانستان کې د خپل پوځي ماموریت او عملیاتو په اړه مهمې پرېکړې وکړې.
د امریکا دفاع وزیر له غونډې وروسته وویل له ۲۰۱۴ وروسته به ایټالیا او جرمني له امریکا سره په افغانستان کې متحد پاتې شي.
د ناټو له نوي پلان سره سم به د امریکا متحد ایالتونه د افغانستان د جنوب او ختیځ د امنیتي چارو مسوولیت په غاړه اخلي خو جرمني او ایټالیا ته به د شمال ماموریت ورله غاړې شي.
ترکیه په پلازمېنه کابل کې د رول پر منلو غور کوي.
خو تراوسه پوري دا پوښتنه حل شوې نه ده چې له ۲۰۱۴ وروسته به په افغانستان کې ناټو څومره محارب پوځیان پرېږدي.
د بریتانیا په اړه هم څه نه دي ویل شوي.
د ناټو سرمنشي اندریس فوګ راسموسن وویل، د ناټو دفاع وزیرانو او د افغانستان په ماموریت کې له ناټو دباندې هیوادونو وزیرانو له ۲۰۱۵ څخه د دې نړیوال ايتلاف نوې طرحه تصویب کړه.
سرمنشي وویل دا نوې طرحه د افغان امنیتي ځواکونو پر روزنې او د افغان امنیتي ځواکونو پر ملاتړ تمرکز لري.
د ناټو نننۍ غونډه د ناټو د دفاع وزیرانو او د ګورجستان د دفاع وزیر ترمنځ په خبرو پیل شوه. ګورجستان په افغانستان کې ۱۵۶۰ سرتېري لري. ناټو موافقه وکړه چې ګورجستان د ناټو غړیتوب ترلاسه کولی شي ځکه چې دغه هیواد د ناټو ټول شرایط پوره کړي دي. ګورجستان وویل چې له ۲۰۱۴ وروسته به له افغانستانه خپل پوځیان ونه باسي.