وطن پال او نور ګټور شعرونه

لونګين

جلال نجيب) صافی
24.07.2004

لونګين
دآســيا پر سينه پروت لونګـيـنه
هره دښته هره سيمه دې رنګينه

لکه ستوری په آسمان داسې ځليږې--- لکه ګل په ګلستان داسې غوړيږې
لکه بلبل په بوستان داسې خنديږې--- لکه شمع چراغان داسې پړاکيږې
د نړۍ په ګرد ملکونوکې نګينه
دآســيا پر ســينه پروت لونګيـنه

ته وطــن د شا ځلمو او ننګيــالو --- ته چــمن د تورذنو توريــالو
ته خاوره د غيرتمندو پښتنو --- دغيرت په شمع سوو جنګيالو
ستا خاوره خټه لوټه ده ننګينه
د آسيا پر سينه پروت لونګيــنه

ستا لمن ډکه دناموس او له غيرت ---- هم ټاټوبی ته د پت او د عزت
هم جګ جګ دې غرونه د عظمت --- پاڼـې ډکې دي ستا له شجاعت
هره لـوټه هره تـيږه دې سنګينه
دآسيا پر سيــنه پروت لونګيــنه

ستالمن باندې چې ايښې آغيار پل دی --- چې پوه شوی چه خپل نه د بل دی
کوم شين سترګی پرنــګی يا مغـل دی --- يا چنګيز غوندې کوم ډاکو غـل دی
پښې ماتې شوي له روسه ترګورګينه
دآســـيا پر سـيـنه پروت يې لونــګينه

ته د(نجيب) د زړه آواز يې --- هم يې نغمې لره ته ساز يې
هــم ېې پـــټ د زړګـي راز ېې --- هم يې يارانو کې ته نـاز يې
د زړه سره نورمه اوســه غمـګيـنه
دآسيا پر سينه پروت لونګيـــنه
12-07-2004
نجيب صافی -ډنمارک