ټولنه او ټولنپوهنه

د ډیپریشن علاج: د قرآن له مخې

زيارمل
03.01.2011

ښاغلو لوستونکو:
یو د هغو اروايي بیماریو څخه د خلکو په مینځ کې ډیر عام شوی ډیپریشن (Depression) دی چې په عربي کې یې د اکتئاب په نامه نوموي، او کولای شو په پښتو کې ترې په (خپګان یا تشویش) سره تعبیر وکړو.
د ډیپریشن د مرض سلنه په ښځینه وو کې د نارینه وو په پرتله په دوه چنده ده.
غالبا ډیپریشن د وخت په مرور سره د څو اونیو په موده کې پخپله له مینځه ځي، خو ځینې اوقات لازمه ده چې ناروغ په روغتون کې بستر کړای شي او د متخصصې درملنې لاندې ونیول شي.
هیڅ انسان د خپګان څخه خلاص ندی، خامخا به په ژوند کې د یو لړ داسې مراحلو څخه تیریږي چې دی پکې د خپګان احساس کوي. خو کله چې همدا خپګان دایمي بڼه غوره کړي د ډیپریشن په نامه یادیږي.
د ډیپریشن د ناروغ څو نښې نښانې په لاندې ډول دي:
۱- بې پروايي
۲- په ژوند کې د نشاط د کچې ټیټوالی
۳- د ملا درد
۴- د حافظې کمزوري
۵- د سر درد
۶- د ستونزو سره د مقابلې ناتواني
۷- بې خوبي
۸- د جنسي اشباع سره عدم رغبت
۹- بې اشتهایي
۱۰- په ځان باندې عدم اعتماد
۱۱- همیشه د جرم او ګناه احساس کول
۱۲- تشویش

د ډیپریشن علاج د متخصصو ارواپوهانو د ځانګړو مشورو او لارښونو په پایله کې شونی دی، او همدارنګه ځینې ډاکټران د ټابلیټونو او ګولیو په واسطه هم د ډیپریشن مریض علاج کولای شي. خو د پورتنیو طریقو څخه یوه هم سل په سلو کې ګټوره نه ده، لومړۍ طریقه کولای شي د ډیپریشن په سلنه کې تخفیف راولي خو له منځه وړای یې نشي، او دوهمه طریقه یو لړ جانبي (Side effects) منفي اغیزې هم درلودلای شي.

لکه څرنګه چې د موضوع د سرلیک څخه څرګندیږي غواړو د قرآن له مخې د ډیپریشن علاج په ګوته کړو. د الله پیغمبر (صلی الله علیه وسلم) فرمايي: علیکم بالشفائین: العسل والقرآن: دوه څیزونه ستاسې لپاره د علاج په توګه کافي دي: عسل (شات)، او قرآن.
خو راځئ وګورو چې آیا په قرآن کې د ډیپریشن د علاج لپاره کومه لاره چاره شته او که نه؟:

خو ترهرڅه مخکې باید په دې باندې پوه شو چې د ډیپریش درجه او تناسب په ټولنو کې تصادفي ندی، بلکې لکه څرنګه چې مشهور لیکوال ډاکټر انور طاهر رضا، او ډاکټره امل المخزومي وايي: په ټولنو کې د ډیپریشن د درجې لوړوالی او ټیټوالی نیغ په نیغه په الله (جل جلاله) او قضا او قدر باندې د هغو ټولنو د ایمان په کچې او عقیدې پورې تړاو لري، د همدې کبله تاسې وینئ چې د ډیپریشن کچه په اروپا کې د اسلامي هیوادونو په پرتله ډیره لوړه ده. دا دوه ارواپوهان زیاتوي: د ډیپریشن علاج په الله باندې د انسان په ایمان پورې تړاو لري هرڅومره چې د یو انسان ایمان په الله (جل جلاله) باندې قوي شي په هماغې اندازه د ډیپریشن کچه هم راټیټیدای شي او آن تر صفر پورې هم راښکته کیدای شي، او دا په مسلمانې ټولنې باندې د الله (جل جلاله) لویه فضل او ستره لوریینه ده.

نور بیا