وطن پال او نور ګټور شعرونه
د صبر مقام
Lotfollah
04.04.2009
دصبر مقام
لویه خدایه !
که دا ستا واګې زما وای
اوآسمان – او آسمانونه
د بنده خبرې منلای
ما ویل به
هسکو سیمو - آسمانونو ته
آسمانونو – راګذار شئ
د ظالم د کور دپاسه
چې د ظلم له سرو وینو
ډک لاسونه د چا مات شي
خو ته نکړې
هغه څه چې زه یې غواړم
ستا د صبر دنیا لویه ده
صبور یې
لویه خدایه !
که د لمر واګې زما وای
او لمرونو د بنده خبر منلای
ما به لمر ته
په تکرار، تکرار ویلې
چې اې لمره !
دښکلا د آیتونو پیغامبره
ورته ګوره – هغه چاته
چې دعوا – دپارسایي کا
چې شیطان دﺉ
د یزدان پاکو جامو کې
چې لېوه دی
خو آغوستې یې جامې د کوم شپانه دي
په هغه باندې
د اور د سرو سکروټو ګذار وکړه
چې شیطان پټو پردو نه را بهر شي
خو ته نکړې
هغه څه چې زه یې غواړم
ستا د صبر دنیا لویه ده
صبور یې
لویه خدایه !
که د ځمکې واګې زما وای
ما به هغه خولې څیرلې – چې ریښتیا یې نه ویلې
ما به ژبې غوڅولې – چې په حق نه کړیدلې
ما به هغه سترګې کسو نه کاږلې
چې د خلکو د ناموس په لور کږې وې
ما به زامې ماتولې
د هغه پلید انسان – چې دعوا د خدایی یې
د فرعون په څېر کوله
ما به ږیرې د انګار په اور سیځلې
چې سپیڅلې ږیرې نه وې
او د خلکو د فریب اغوا لپاره
په ټټر را زنګیدلې
خو ته نکړې
هغه څه چې زه یې غواړم
ستا د صبر دنیا لویه ده
صبور یې
غفران غواړمه له تانه
خوله دې ماته شی – زما- چې ما ویلې
که د خدای واګې زما وای
ما به زامې ماتولې
(عنایت الله پویان)
میوند ننګیال
05.04.2009
محترم لطف الله خانه سلامونه !
ډير زړه راښكونكي او ښايسته خداي مو هميش كامياب لره