وطن پال او نور ګټور شعرونه

دکربلا الهام دالفت په ژبه

منلی
01.02.2006

کله کله توره شپه کښی فضا ډیره ظلمانی شی
بحرانی مهیب حالت وی هواډیره طوفانی شی

توری وریځی راخپرې شی پکښی ورک شی آسمانونه
آپتونه راوریږی خطرناک شی بارانونه

سیلابونه راروان شی سراومال وی په خطرکښی
اضطراب وحشت اوډاروی زړه کښی سترګوکښی په سرکښی

سیاسی فضا شی خړه تندریزه او مهیبه
ډارحاکم فکرمحکوم وی ژوندبی خونده بدنصیبه

ابوالهول یزید پیداشی چی دخلکوباسی زړونه
ورسره په کربلاکښی یوبلا مصیبتونه

هیبتونه دهشتونه مسلط وی په هرچا
هرسړی وی وارخطا چی مهیبه وی بلا

هره خواوی تورتمونه عقل فکر وی حیران
چا ره ورکه وی هرچاته بیچاره ښکاره شی ځان

نشاط نه وی په حیات کښی دخندا قحطی ګرانی وی
عذابونه عتابونه فشاورنه مجانی وی

مایوسی پریشانی وی خوښی نه وی په عالم کښی
بلبلان باغ کښی کړیږی وی اورونه په شبنم کښی

دغضب حکمرانی وی خوله خنداته نه جوړیږی
هرساعت یی قیامت وی هریوزړه کښی پت ژړیږی

هیڅوک هیڅ نشی ویلی جرائت سلب شی له هرچانه
جهان هرچاباندې تنګ شی له هرلوری هری خوانه

داسی ډېربدبدحالونه په انسان باندې راغلی
زلزلې او طوفانونه په جهان باندې راغلی

په همداسې سخت ساعت کښی پیداشوی لوی کسان
چی ځان نه سپاری طوفان ته اوسپریږی په طوفان

دطوفان په سرنوح کېښوددبشردبقاپنډ
دتدبیر عزم په مخ کښی طوفان کله ګرځی خنډ

که هرڅومره لوی طوفان وی عمریی لڼډلکه ظالم وی
دنوح عمریې نصیب شی چی طوفان باندی حاکم وی

خاوندان دارادوتل په جرئت مومی نجات
له خطرسره جنګونه حقیقت دی دحیات

نمرودان سوزوی اورکښی که دعصرابراهیم
حق پالونکوته نه ښایی چې باطل ته شی تسلیم

که یزیدپه کربلاکښی ظلم کړی له حده تیر
شهامت به دحسین څوک ترقیامته نکړی هیر

یزیدنوم داستبداددی دسمبول په حیث جهان ته
حسین ډیر اعلی مثال دی دایمان اهل ایمان ته

ظالمان دیوه کوردی که عرب وی که عجم
وي ابولؤلؤکه شمرکه رحمن ابن ملجم

یو ظالم دی چی په یونوم او په بل نو مسمی َ شی
سکندروی بیاچنګیزشی بیاتیمویااتیلاشی

په یزید باندې وریږی ترقیامته نفرتونه
دحسین په غم کښی ژاړی جهانونه عالمونه

که جابرچنګیز هرڅومره په قدرت دی مشهورشوی
خوبیاهم جلاالدین ته په ستاینه مجبورشوی

هلاکوبدګڼی هر څوک چی قاصدودهلاک
هټلران هرچاګڼلی دښمان دژوندوژواک

ددجلې رودظالمانو دانسان په وینو سورکړ
په وحشت بربریت يې جهان خلکوته تنور کړ

هغه څوک وچی یې جوړې دسرونو منارې کړې
چاودان ښارونه وران کړه ترینه جوړی یې میرې کړی

چا دی سوی په اورونو بشري تمدنونه
چا وژلی دی فکرونه چاتباه کړه هنرونه

څوک دقهر قهرمان وپه بامیانو څه تیر شوی
غلغله کښی چی څه شوی دجهان کله هېرشوی

څنګه راغی څنګه لاړه له جهانه سکندر
څه یې وکړه دلته هلته ورشه وپوښته خیبر

غجیبه غوندې جهان دی عجیبه یې دي کار ونه
کله وران کله ودان کړي قدرتونه هیواودنه

سقراط فخر دیونان ؤدیونان قدرت محکوم کړ
په زندان کښی یې دزهروپه پیاله باندې مسموم کړ

اصلی کوردفلسفوشوفیلسوف لره زندان
یونان ولې سقراط وژنی سقراط ژونددی دیونان

په فرمان دروم مسیح دی په سولی خیژول شوی
اوس مرکزدمسیحادین دلوی پاپ دی ګڼل شوی

دغه راز کارونه اوس هم په بل رنګ اوبل عنوان شته
په بل نوم بله څیره کښی جهانسوزجهانګیران شته

په دی ځمکه نه مړیږی ددې عصرناپلیون
لاس یې واچاوه اسمان ته اوس سپوږمۍ ته لري یون

سل چنګیزه دی پټ شوی داتوم هره زره کښی
دجم ډېر جامونه ګوره درادارپه آئینه کښی

ورانولو ته جوړیږ ددنیا عمارتونه
تباهی ته خدمت کاندی ددي عصر تخنیکونه

استعمارکله ورکیږی جامه شکل یې بدلیږي
استبدادپه نوم نوی بڼه سیاست لره ځوم کیږي

په دې څه که دظالم نوم ایښی پلاروي رحیم خان
په ښه نوم کله ښه کیږی چې یې خوی وی دحیوان

حقیقت خونه بدلیږی که ظلمت وبولونور
دهلک په جامه کله هلک کیږی دچا لور

له تیارو سره رڼاوي همیشه لاس وګریوان
په هر وخت کښی په جګړه وي اهریمن سره یزدان

ظالمان په ایماندارو نشی کړی حکمرانی
دظالم ظلم ته غاړه کله ږدی مسلماني

غرقیدونکی دي غرقیږي که فرعون دی که قارون
چی پیداشی په ولس کښی یوموسی اوبل هارون

دنمرودامرته غاړه نه ده ایښی ابراهیم
دفرعون قدرت ته کله تابع شوی دی کلیم

اسلام نه منی هیڅکله دیزیدمتابعت
حسین سرشی ورکولی نه لاسونه دبیعت

محمد(ص) اومومنانو کول ځکه جهادونه
چی دخدای (ج) په لاره سم کړي دابي لاری قدرتونه

داسلام روح دی جهاد نارواسره عناد
حمایت دمظلومانو ورکول دهر فساد

هغه کله مسلمان دی چی خرکیږی ددجال
وظیفه دمسلمان ده له دجال سره جدال

چاچی یوقدرت منلی په جهان کښی دالله
اصلی کاریې دی جهان کښی جهادفی سبیل الله

مومن کله شی منلی یو مطلق آمریت
اولوالامرداسلام دی مقیدپه شریعت

په هغو تل مسلط وي ظلم جبرقهرزجر
چی په ظلم کوي صبر او له خدایه غواړی اجر

مکلف په مشوره دی اولوالامرداسلام
بی نیازه مشوری نه کله وخیرالانام (ص)

حقیقی مسلمان نه دی داایمان څه ایمان نه دی
چی حسین غوندې یزیدته ټنینګ ولاړپه میدان نه دی

اسلام نردی او نرتوب دی شهامت زړورتوب دی
نه ژړانه انګولاده نه دظلم مرئیتوب دی

نوربیا