اسلام، اسلامي شرعه او د اسلام تاریخ

د الله تعالي لپاره د جمع ضمیر ولي په قرآن کریم کې ذکر شوی دئ؟

عبدالسلام حنف
27.10.2016

د الله تعالي لپاره د جمع ضمیر ولي په قرآن کریم کې ذکر شوی دئ؟
لیکنه. عبدالسلام حنفي
جواب. د جمع ضمیر الله تعالي ته چې په قران کریم کې ذکر شوي دئ ډیرې وجې لري چې یو څو به يې موږ تاسو ته بیان کړو.
۱ اول د الله تعالي د عظمت لپاره. ځکه د عظمت لپاره کار شوي دئ چې بزرګ شخص معمولاً تنها نه وي یعنی د هغه خدمت کوونکي او فرمانبردار همیشه د هغه د خدمت کوشش کوي نو په دې صورت کې يوه اجتماع ترې جوړیږي نو ځکه د جمع ضمیر راوړل شوي وي.
۲ کله کله د جمع ضمیر د یوې مهمې موضوع په خاطر جمع راوړل شوی وي لکه قران کریم د تحریف څخه ساتل چې الله تعالي يې په بندګانو هم ساتي او خپله هم او د ملایکو په واسطه یې نازل کړی هم وي نو واسطه کې پیدا شي نو ځکه د جمع ضمیر راوړل شوی وي. لکه الله تعالي چې فرمایې [سُوۡرَةُ الحِجر : 9]
إِنَّا نَحْنُ نَزَّلْنَا الذِّكْرَ وَإِنَّا لَهُۥ لَحٰفِظُونَ
دا ذكر (قرآن)، دا موږ نازل کړيدى او موږ په خپله ددې ساتندويان يوو.
۳ کله د جمع ضمیر ځکه راوړي چې هغه کار د ملایکو په واسطه کوي چې د الله تعالي لښکر او عسکر دي نو ځکه د جمع ضمیر راوړل شوي وي.لکه چې فرمايی. [سُوۡرَةُ القَمَر : 49]
إِنَّا كُلَّ شَىْءٍ خَلَقْنٰهُ بِقَدَرٍ
موږ هر څه له يو تقدير (اندازې) سره پيدا کړي دي
۴ او کله کله د واحد متکلم ضمیر راوړي ځکه چې هغه کار خپله الله تعالي سر ته رسوي هیڅ د چا واسطې ته په کې ضرورت نه وي. لکه چې فرمايي. [سُوۡرَةُ طٰه : 12]
إِنِّىٓ أَنَا۠ رَبُّكَ فَاخْلَعْ نَعْلَيْكَ ۖ إِنَّكَ بِالْوَادِ الْمُقَدَّسِ طُوًى
زه ستا رب يم، پڼې (څپلۍ) دي وباسه، ته د طوا په سپېڅلي ناؤ کښي یې
او نورې هم ډیرې وجې شته موږ په يو څو باندې کفایت وکړی.