نړيوال ښکيلاک او د لرو بر افغان دازادۍ غورځنګ

فدايي محاذ ادعا کوي چې ملا عمر ۲ کاله پخوا وژل شوی دی

میرویس
24.07.2015

ګرانو وطنوالو، السلام علیکم
فدایي محاذ چې د طالبانو یوه پخواني معتبر قوماندان جوړ کړئ ؤ، ادعا کړې چې د ملا عمر د وژنې په باره کې کره رپوټ او مؤثق اسناد لري چې هغه دوه کاله مخکې وزل شوئ ؤ.
همدغسې هم د داعش مشر ملاعمر غوندې د عامه او خپلو پیروانو د انظارونه غیب شویدئ. کیداشي چې هغه هم وژل شوئ وي. دغه دواړې ډلې چې د جهاد نارې سورې وهي، بیا دوی دواړه یو دبل د سر وهلو ته ناست دي. طالبانو داعشیان په فراه کې تس نس کړل او په ننګرهار کې یې هم د شرمونکې ماتې سره مخامخ کړل.
طالبان پخواني کفن کشان دي، او داعشیان بیا نوي کفن کشان شول.
====
فدايي محاذ ادعا کوي چې ملا عمر ۲ کاله پخوا وژل شوی دی
• پنجشنبه, 23 جولای 2015 7:49
• خپروونکی: تاند http://taand.com
تاند- فدايي محاذ، چې د طالبانو انشعابي ډله ده، ادعا کوي چې د طالبانو د تحریک مشر ملامحمد عمر اخوند وژل شوی دی.
د فدايي محاذ ویاند قاري حمزه رسنیو ته په یوه لنډ برېښنالیک کې ویلي چې فدايي محاذ موثق راپور او ثبوت لري چې د طالبانو مشر د اختر محمد منصور له لوري وژل شوی دی:« محاذ یو کره، مؤثق او باثبوته راپور تر لاسه کړئ چې امیر المؤمنین ملا محمد عمر مجاهد د نن څخه څلورویشت میاشتې وړاندې د ملااختر محمد منصور د امارت اسلامي نايب او ګل آغا د امارت اسلامي مالي مسؤل له خوا په بې رحمۍ سره په شهادت رسیدلی دی.»
د ملا محمد عمر اخوند د مړینې خبر څه باندې دوه کاله وړاندې یو شمېر لوېدیځو رسنیو خپور کړ خو طالبانو د هغو راپور رد کړ، ویې ویل چې ملا عمر ژوندی دی.
ډیلي بیسټ لیکلي و چې ملا عمر د پاکستان د استخباراتو له لوري په محبس کې وژل شوی دی.
د فدايي محاذ له لوري د ملا عمر د وژل کېدو راپور په داسي وخت کې خپرېږي چې طالبانو د افغانستان له حکومت سره د لومړي ځل لپاره د جولای په اوومه مخامخ خبرې وکړې او په راتلونکو څو ورځو کې بل پړاو خبرو ته تیاري نیسي.
ویل شوي چې ملا اختر منصور، چې د طالبانو سیاسي مشري په غاړه لري، د سولې د خبرو ملاتړ کوي او په دې برخه کې د یو شمېر لا سختدریځو له مخالفتونو سره هم مخامخ شوی دی.