خدايه بيا کډې بارېږي ـ زړه مي ستړى ستړى کېږي .
بيا يو څوک رانه بېلېږي ـ زړه مي ستړى ستړى کېږي

سپېره دښته نه ختمېږي ـ منزل وار په وار ورکېږي
مازديګر دى لمر ډوبېږي ـ زړه مي ستړى ستړى کېږي

هلته لېري څوک ژړېږي ـ لا زګروي اورېدل کېږي
نيمه شپه ده ډزې کېږي ـ زړه مي ستړى ستړى کېږي

وينم خوب دوړې بادېږي ـ وينې پلو کې ترې پاتېږي
خدايه څه به را پېښېږي ـ زړه مي ستړى ستړى کېږي

ورځ په ورځ راته ګرانېږي ـ نن مي بيا سقيم يادېږي
شپه به بيا څنګه تېرېږي ـ زړه مي ستړى ستړى کېږي

د لېمې له يادولو سره يې كاپي كول پروا نه لري