هو هغه غرقاب یادوم چې د ډېرو د بنډارونو یار و ، هماغه عرقاب چې کله به یې پر دریځ شعر اوروه نو د شرنګېدلې غږ انګازې به يې تر لرې سېمو پورې اوریدل کېدلې .
نن مې غوښتل وررسره خبرې وکړم ، وروسته له ډېرې مودې یې غږ واورم ، وروستي ځل مې هغه پوره یو کال وړاندې په همدې پسرلي کې په وزیرو کې دسپین غر په کلنۍ مشاعرې کې لېدلې و .
نن مې غوښتل د ژوند د ستونزو او کړمو په اړه ترې وپوښتم ، نو واړه ثنا الله ته مې تېلفون وکړ ، خو لکه چې زما او د غرقاب د خبرو نصیب نه و ، چې کله ثنا الله تېلفون واخېست نو پوه شوم چې د خپل پلار صفت الله غرقاب په جنازې پسې روان دی .
انا لله و انا اليه راجعون
د پښتو ژبې خوږ ژبي شاعر، فرهنګي او د ادبي بنډارونو سرلاری صفت الله غرقاب په داسې حال کې له دې نړۍ څخه سترګې پټې کړې چې د ژوند له ګڼو ستونزو سره لاس او ګرېوان و . تر یو حده یې زه پر ستونزو خبر و م، خو فکر مې نه کاوه چې دا ستونزې به دومره جدي وي چې د خوږ ژبي او مست شاعر غرقاب ژوندبه یې له ګواښ سره مخ کړی وي . د ناروغۍ په اړه خو یې چا راته هېڅ هم نه وو ویلي . او نه مې فکر کاوه . ځکه خو ځان راته د هغه خورا زیات پوروړی ښکاري .
خدای بښلی عرقاب لاړو او زما په شمول يې ګڼ دوستان او ملګري د مینې او مرستې داسې پوروړي پاتې شول چې فکر نه کوم داپور به يې ادا کړی شو .
زه خدای بښلي صفت الله عرقاب ته دعاګانې کوم خدای دې جنتونه ځای کړي . او خپل کشر وراره ثنا الله او ددوی ټولې کورنۍ ته تسلیت وايم .
ثنا الله روکیه ! پوهېږم غم ډېر دروند دې ، خو د ژوند د غمونو د پيټو چلولو ته به په زړه او مټو کې ځواک پیدا کوي .
له ټولو فرهنګیانو او د غرقاب له خواخوږ څخه غواړم چې ثناالله دې درانه غم ته ېوازې نه پرېږدي ، څنګه چې کولای شي د خدای بښلي غرقاب د وړو بچیانو او پاتې کورنۍ لاس نیوی دې وکړي . د پلار په تللو د هغوي ستونزې نورې هم زیاتې شوې . او موږ ټول باید هېڅ ډول مرسته ورڅخه ونه سپموو .
خدای (ج) دې د غرقاب پر درنې کورنۍ رحم وکړي او خدای (ج) دې نور له غمه وساتي .
په خپله ټوله خواخوږۍ
اجمل اند
پراګ ، چیک جمهوریت
