د حزب اسلامي افغانستان د سیاسي دفتر اعلامیه

بسم الله الرحمن الرحیم

 حزب اسلامي  افغانستان  په ټولو هیوادوالو او په ځانګړې  توګه د مۍ د میاشتې په  شپږمه د فراه  ولایت  د بالا بلوک په  ولسوالۍ کې  د هغه ځای  پر بې وزلو او بې وسه  اوسیدونکو ،کوچنیانو ، ښځو او زړو  باندې  د امریکایې  بې واکه ، خپل سرو  او غاصبو ځواکونو  وحشیانه  بمبارۍ،  چې په پایله کې یې تر  (۱۷۰ )   زیات  معصوم او مظلوم   افغانان  په  قتل  ورسیدل ، یو ستر وحشیانه ، غیر انساني عمل  ګڼې او په سختو ټکو کې  یې  محکوموي .

 د ۲۰۰۱ میلادې کال  را هیسې  ، یعنې د امریکا تر مشرۍ  لاندې   دناټو  د ټولې  په لاسو د هیواد  د نظامي اشغال  څخه   تر اوسه  پورې،  د بې  لورې  خواو د څیړنو  له مخې،  زمونږ دهیواد تر (۸۰۰۰۰) زرو    زیات  مظلوم  هیوادوال  دهمدې  اشغالګرانو  په  لاسو او دهغوی د لاسپوڅو په دښمنانه راپورنوپه قتل رسیدلي .د  ودونو او خوشحالیو  د غونډو  اویا د خیر خیرات  او ختمونو  د مقدسو  مجلسونو څخه نیولې  تر د جنازې  دمراسمو پورې  یې دسولې  او ټولنیز  درنښت  ټولې  غونډې  بمبارکړې . دغه بمبارۍ  اوس ددې  خپل سرو  اشغالګرانو  یو موډ  ګرځیدلې  او   په  یوه  ساده   (ساري ) او  معذرت  سره  له منځه  ځې  چې مهم  مثالونه  یې  د  فراه  د بالابلوک  تر څنګ د  هرات  په شین ډنډ ، د کنړونو ، ننګرهار ، لغمان ، پکتیا  ، پکتیکا، خوست ، هلمند ، قندهار  ، قندوز  او .....: کې  تر سترګو کیږي .

د اشغالګرانو  له  اړخه  تپل شوي ولسمشر  ته  اویا دهغې  ددفاع وزارت  او  پارلمان ته ،  د اشغالګرانو  د لاس پو څوپه څیر، د هغوې د کړونو د قانونی کولو  او مجاز ورکولو پرته نور هیڅ واک  او  اختیار  نه شته . دوې دټولو  هیوادوالو  او په ځانګړی توګه  د یوه  قومی توکم  د له منځه  وړلوسره  هیڅ  ډول  غمرازی  نه لری ، بلکه د ولس د قهر او غضب  له ویرې  یواځې په ژبه  اوهغه هم په  هماغه وحت کې خپله  غمرازی  اعلانوې  چې  څو  ورځې  وروسته یې د جیبو په  ډکیدو    له یاده  وځي .

 حزب  اسلامي  افغانستان  په  داسې حال کې چې دبشر د حقوقو د ساتنې د ټولو  بین المللې مؤسسو  څخه  غوښتنه کوي  ددې  او ددې  په څیر د مخکینو ټولو عامو وژنو  په اړه   تحقیق  او څیړنه وکړې او ددې  وحشیانه او غیر انساني عمل  کورني او بهرني  مسؤلین  د عدالت  مخې ته را کش  کړي .  همدا راز   خپل  مؤمن او مجاهد ولس ته  دا په  ډاګه کوی  چې   تر هغې  چې  اشغالګران  او صلیبي ځواکونه د افغانستان په سیاسي  او نظامي مقدراتو باندې  ولکه  ولری  او زمونږ  دخاورې  جغرافیایې تمامیت   ددوې په لاسو کې وي او د هیواد  لاس  پوڅې  مشران ددوې له اړخه  و ټاکل شي اود  ولسي  جرګي  غړی دهغوې تنخواه  خواراه   او مزدوران وي   نوتر هغې  به زمونږ  ولس  دهمداسي  یا دد ې  څخه په  خرابو  او کړکیچنو بحرانواو ستونزو کې را ګیر وي . د ټولټاکنو  او یا  دټولټاکنو تر نامه  لاندې  د مهرو او څیرو  په  بدلون   به نه  زمونږ  هیواد  ته  سوله او امنیت  را شی  او نه  به د اشغالګرانو په موجودیت  کې  د ولسې وګړو  ژوند  ددې  بدحالۍ  څخه  وژغورل  شی .

په  دې  اساس  حزب  اسلامي افغانستان  د ټول ولس او د ولس  د لیکوالانو او روڼ اندو ټولو هغوې څخه  چې دهیواد د ازادۍ او استقلال  د بیرته   اخیستو سره مینه  ولري  په کلکه غوښتنه  کوی چي د اشغالګرانو د پوره او مکمل وتلو  او دهیواد  د اوسنۍ غمیزی  د سیاسي  حل  له پاره سره یو  لاس  اویو موټی  شی  او نه یوازې  داچې  اشغالګران   دخپلې خاورې   څخه  لکه د شوروی  اتحاد د زبرځواک  په څیر  تیښتې ته اړ کړي   بلکه  دهغوې لاس  پوڅې  او پلورل  شوې  عناصر  هم ورسره یو ځاې د ګودال  کندې ته   وسپاري .

 حزب اسلامي  تل  د خپل ولس  د ازدۍ  او استقلال   له پاره  ټول  سنګرونه  ګرم  ساتلي اوهوډ یې کړې چې تل   به د هیواد  د استقلال  او ازدۍ د تر لاسه کولو   له پاره  د خپل ولس  تر څنګ  ولاړ  وي. 

 تل دې وي  افغانستان

مړه  دې وي  زمونږ د مظلوم  ولس  وژونکې او اشغالګران